(曾智華)
每朝幫襯的茶記，以周一、三、四、日最熱鬧，點解？因大群的士大哥七點開《城市論壇》，二、五、六就批評社會現象，水花四濺，而周三及周日呢，就個個馬評家上身，力指呢隻必W、嗰隻瓜直，難得全部老友記，互踩一番後，冇真正扯火。至於一、四又如何？十個有八個哭馬喪，只有兩個晒命——喂喂，好易中，好易買餐餸呀！
班大兄娛樂性相當高，搞到我經常唔知聽論壇好，定睇報紙好。
周三，咦，乜突然講政治題，唔講馬呀？喂，竟然評論政府政策？
肥司機：「呢屆政府都幾黑仔，推垃圾徵費，身水身汗過晒立法會，然後投降收工；安全帶條例也如是，原因簡單，根本民間未接受及配套未齊就硬推，當然瓜直。呢兩項影響民生，市民嘈到拆天正常。哈，估唔到籃球博彩都出唔到閘。」
矮司機：「喂，呢單嘢好奇喎，根本過晒立法會，冇市民反對，又可增加稅收，但竟然政府自己話唔玩住。老友，大家可知推一項政策幾難？如今唔玩，正常推測，冇理由政府自己縮，一定係有『不可抗力』因素，高佬點睇？」
高佬：「呢壇籃球博彩，根本社會需求唔大，本意應該是打擊外圍及增加稅收，如今叫停時，解釋到一口泡，話唔定有關金融安全未諗掂啩，聽講美國個Prediction Markets，係特朗普個仔有份㗎，都係睇準啲好。」
講到此，夠鐘開工，一哄而散。
那邊廂，買餸師奶群組立即發力，一錘定音——乜都賭餐懵，賭少樣會死咩？
小弟只會心微笑，因從來對籃球博彩冇興趣，關人個關。
明日跑沙田，都係咪拗頸，優先研究袁幸堯，七匹中以「君達得」、「超加加」及「友愛心得」最大機會，一於三串七W、三串四P！