上周四，手機N咁多訊息彈出，全為散戶老友報憂，大喊十咁款問：「死咯，碌Sir，維他奶跌破8蚊喇，點搞呀（對方好似想喊咁聲）？」一律答：「買賣股票，自己分析自己決定！」
維他奶升到12.88元時我冇沽
我曾在本欄多次分析維他奶（345），主因見到股權出現重大變動，兩個保守大家族不斷增持，一場爭奪戰隱隱隨時爆發。維他奶屬傳統的公司，老字號，作風雖舊派，但勝在殷實，大股東唔會蠱蠱惑惑。於是，用閒錢在8元多至9元多買入，純考考眼光兼「睇戲」。
維他奶升到全年新高12.88元時我冇沽，跌到全年新低6.86元亦冇再狂掃，因此股並非我的柱躉股（中電、港交所、國泰航空及港鐵）。
散戶點解成日蝕？因買入股票不看長線，只日日睇住個價位，一係笑，一係喊，咁樣當然神經緊張容易出錯。
買股票，事前應做足分析，買入後，除非出現嚴重基礎性負面轉變，否則不應多多手又買入又賣出。乜叫嚴重基礎性負面轉變？例如早年滙豐集團董事局決定將銀行變為World Bank就是了。放棄穩賺的地區性龍頭銀行位，走去打「世界波」，結果，被多國地方政府玩殘，尤其是美國佬，玩你時，當然心狠手辣。
謹記股神巴菲特名言
我不是「大喊十」散戶，睇上市公司，不會以三朝兩日股價作判斷。反之，謹記股神巴菲特的名言——「別人恐慌我貪婪，別人貪婪我恐慌」，以及本欄早已提過的三M法則。
正因不時逆群眾思考，才會在過去5年賺下非常可觀利潤，包括當人人因疫情沽出國泰航空（293），令其股價跌至4元左右時，我不但掃貨兼且瞓身供股。另外，港交所（388）在2022年10月跌到220元，烏雲密布的日子，立即當埋底褲（沽出長揸的部分中電）盡掃。
小弟多次強調，我的倉位主體由4隻「政府唔畀得佢死」股組成，一跌過龍，不但唔會做「大喊十」，反之掃掃掃。維他奶不屬以上類別，故我不會瞓身，只在冷靜分析下，揸住等「睇戲」而矣，不但不會喊，反之越跌越………。
資深傳媒人 曾智華
相關文章：習特會結果 料左右全球政經大局｜古天后
