林作和裕美近來可謂禍不單行，日前裕美到深圳慶祝中秋佳節，在當地吃了街邊小食後疑食物中毒，需緊急返港入院求醫連打兩針，之後又誤被愛犬咬傷見紅。一波未平一波又起，日前《星島頭條》直擊兩人現身中環，原來林作心愛的跑車再次在街頭死火「跪低」，不過就無損他們心情，繼續食飯撐枱腳，實行拍住拖等拖車。文、圖：娛樂組
林作裕美撐住枱腳等拖車
林作向來對Alfa Romeo古董跑車情有獨鍾，不過他的愛跑卻頻頻「出事」，今年7月及8月兩架紅色跑車都先後「跪低」，當時已經有網民笑說：「不如買架拖車，美美揸架拖車拖住你部爺爺車行。」果然愛跑又出問題，日前約下午4時，見林作駕駛其中一架紅色跑車出巡，並停泊在中環路邊打了「死火燈」，他與裕美則坐在車內一臉無奈，原來愛跑再次「跪低」；兩人等拖車期間，就爭取時間拍拖，到附近搵食撐枱腳，期間有一位滿頭大汗的白髮大叔要求合照，林作都表現親民、有求必應，更坐上已經死了火的跑車車頭擺甫士，心情似乎未受影響。
裕美食出禍
大約一小時後，兩人離開餐廳，並接受《星島頭條》獨家訪問，林作表示：「我哋今日嚟拍拖，架車喺街度壞咗，不幸中之大幸係可以拍埋一邊先。」他更笑言已經習慣了經常壞車，並自嘲：「聽我講唔好買跑車，買啲穩陣啲嘅車！」身旁的裕美就表示在家出發前往中環時已經感覺怪怪的，因跑車的指示燈亦亮着了。當日裕美化了一個淡妝，相當醒神，提到日前中秋節在內地食物中毒，她親述事件經過：「凌晨兩點，我話想落便利店買嘢食，跟住我同阿作落咗去周圍都冇嘢食，阿作就話附近有啲檔仔（街邊食物）仲正，就帶咗我去食，事後，就話我自己要去食！」裕美又指當地的街邊食物，有炸物、串燒、蔥油餅等全都非常便宜，數十元已買到一大袋。
林作戲言中毒冇影響行房
裕美續指發病時出現痾嘔及發燒症狀，非常辛苦，要入醫院打針，「打咗兩針，我要求醫生打三針，想快啲好返，但醫生話驚我承受唔到。其實我唔知自己係咩事，但林作同我食同一樣嘢，佢完全冇事，肚痾都會啩？我可能積咗好耐嘅疲勞，再食啲好油，或者少少污糟嘅嘢就引爆！」裕美續指休息了5天後已漸漸康復，「起初食白粥都會想嘔，而家嘗試食其他嘢，好咗好多。」林作即在旁搞笑謂：「但係冇影響到行房（裕美：我更加想嘔）！」而剛剛才食物中毒完的裕美，當晚又在社交網表示為分開兩隻愛犬打架，誤被咬到中指流血，相中見兩張染滿血的紙巾，裕美更用紗布包紮住手指，認真多災多難。
