(曾智華)
香港馬會上周日超前決定周三唔跑馬（究竟今天出唔出到正常日報呢？），呢個三日前的決定，似乎在馬會歷史上從未發生，絕對突破。
一直以來馬會都相當好運，N咁多次個天就晒佢，賽日跑時冇風，跑完打風。又或跑時有雨，跑前跑後則倒水咁倒，兼且行雷閃電。
今次馬會果斷決定，當然因知道冇得博。現代科技預測天氣準到飛起，尤其呢個「樺加沙」，擺明超級強風直撲香港，早早決定取消賽事，你可知能夠慳返幾大數額的金錢？
馬會前高層C哥拉我摸酒杯底解釋：「 ，碌Sir，跑一日馬其實好大陣仗，牽連甚廣，絕對不是只關開賽當日事。簡單，三日前已經要開始做好報名及排位工作。一排位，坊間數十份馬經立即開工，百計馬評人寫呀寫、度呀度，火速交稿。報紙收到排位表及馬評人稿件，跟手做編輯工作，再交印刷廠，印完鬥快交分銷商散去報攤及便利店。以上一條龍業務，你話要花幾多錢？假若全部做晒，才公布冇馬跑，所有本錢就此泡湯，蝕到失聲。」
C哥進一步指出，若臨時取消賽事，馬會本身更損失慘重。
「跑一日馬，就似部署一場大型戰事。每個賽日，沙田及快活谷兩邊有數萬人入場，由飲飲食食到現場投注，加上保安、清潔等工作，涉及千計服務員，另場外投注站及餐飲服務也以百計。呢隊大軍，加埋食物，若周三跑馬，周一已要開始作準備。若臨時才決定唔跑，人工、食材費用必須照畀，你話要幾多錢？」
還有更甚是，周二開始接受投注，唔跑，要搞退款，又係一大筆支出。
總結，臨時取消賽事，馬會及相關行業全部損失慘重，若果早知早決定，起碼慳返億元 。
