林家謙合共十場紅館演唱會《White Summer》昨晚（19日）開鑼，今次是紅館繼MIRROR演唱會事故後，首個批准使用高空裝置的演唱會，而林家謙亦去到盡，用吊車升上22米高與山頂觀眾作近距離接觸，而鄭秀文坦言為了報恩，就算改機票延期都要到場擔任嘉賓。
鄭秀文53歲生日 Encore時登場
全晚唯一的嘉賓鄭秀文在Encore時登場，她與林家謙分別合唱《下一位前度》，唱完Sammi先跟大家打招呼，笑問︰「大家是否識我？因為隔了好多代。」Sammi又爆為了報上年林家謙做自己演唱會嘉賓的恩，所以就算買了機票也特意改時間。適逢昨日是鄭秀文53歲生日正日，身為I人的林家謙就表示，要做I人的地獄嘢就是要領唱生日歌，之後全場大合唱生日歌給Sammi，她笑言︰「第一次聽完冇生日蛋糕吹！」林家謙指有準備禮物，他指上星期在失聲、失眠的雙失狀況下，想到為Sammi寫的新歌旋律，更即席播出，笑指若唔鍾意可以「彈鐘」，Sammi就笑指「唔夠膽」，至於Sammi則表示也有禮物送給林家謙，反問對方：「燙斗最需要咩？」當林家謙答「水」時，Sammi即笑說是「燙衫板」，之後拿出寫了「Dear i人（IRON）GOOD SHOW！」的燙衫板送給林家謙，而下款寫上「With Love 燙衫板上 Mi」，指為了襯林家謙特登去買眼鏡。
在兩人合唱《CHOTTO 等等》前，Sammi指這首歌推出的時候，現場可能人有人未出世，林家謙就認真地表示自己當時應該兩歲左右，搞到Sammi即問︰「使唔使咁呀！」
相關文章︰林家謙演唱會丨容祖兒張敬軒送花籃賀演出成功 驚喜與舞蹈員「跳了兩下」掀高潮
林家謙紅館騷「隨意盒」大變身
今次演唱會四面台設計，台上放了一個巨大的方形裝置，配四個圓形LED巨型屏幕，身穿全白燕尾西裝的林家謙於方形裝置中間現身唱出《夏日之子》，為演唱會揭開序幕，之後方形裝置散開，LED屏幕亦升上半空，林家謙亦從裝置走出來，期間他也興奮地跟全場跟歌迷打招呼，之後亦站在台上運輸帶兜均全場，隨便在唱到《聽到你一聲「喂～」，我沒了》，與舞蹈員一起「跳了兩吓」，惹來全場大叫。連唱多首歌後，林家謙在跳舞環節中唱出《隨意門》時，從台下飛彈上台，帶領超過20位舞蹈員一起跳，令全場氣氛high爆。之後林家謙升上約兩層樓的高台唱《一人之境》，又瞓床唱《小林不動產》，之後他也有施展琴技自彈自唱，不過唱到《某種老朋友》時，他的電子琴卻突然沒有電，至於唱到《時光倒流一句話》時，他突然哽咽。
林家謙坐吊車繞場
提到全場最矚目的，必定是林家謙唱《在空中這一秒》時站在一個升上總高度22米的360度環繞吊車繞場一周，跟山頂觀眾作近距離接觸，他也拿著相機幫觀眾影相，而大家非常也配合地擺心心甫士，更有情侶互咀，搞到林家謙笑指自己是行走的「Kiss Cam」，而為免有意外發生，吊車環繞期間均有約十名工作人員在車下傍實，安全措施做到足。到他唱《Free fallin’》時就有舞蹈員以懸浮狀態升在半空，其後也有扮道士的舞蹈員表演空中雜技兼爬上巨型裝置頂部，不過好笑的是，當林家謙想離台時卻找不到落台的裝置。
林家謙連唱25首歌先Talk
連唱了25首歌後林家謙終於開口，他笑言剛才很刺激，因為琴沒有電，他表示這是「White Summer」的意思：「我覺得夏天係好特別嘅季節，因為佢係最豐富最變幻嘅季節，最近天文台嘅關心都好豐富係咪？突然間可以係酷熱天氣，下一秒就可以係雷暴，跟住黃紅黑雨，又十號風球又冰雹，夏天就係咁豐富，就好似我哋人生咁樣，隨時唔知下一秒就係個琴冇電，跟住就係要咁樣Move on！」他指大家都是「夏日天氣之子」，就算個天主宰天氣，也可以用心態或節奏去指揮這個世界：「我覺得人生都好似啱啱呢個隨意盒咁，又開又閂，你唔知道幾時打開同閂埋，冇得超前部署，唯有將個心打開迎接一啲冇電嘅時刻。」他又透露演唱會舉行前的兩至三星期，因聲帶出問題醫生指他不能練歌一個星期，令他感到很不安，但人生就是這樣，故叮囑觀眾：「快樂時候唔好太快樂，絕望時候唔好太悲傷，保持自己心態平衡，就可以破解到自己心入面同埋呢個世界好多嘅地獄。」隨即唱出電影《破·地獄》片尾曲《普渡眾生》。
紅館騷呼應林家謙《SUMMER BLUES》
完場前，林家謙指這一場很特別，因為這場是三年前《SUMMER BLUES》的第一日，很有紀念價值和意義，故今晚是「林家場」，故有7000幾個CLS（粉絲暱稱）在場，又搞笑地叫人不要「冒認」，別人會以為「CLS」這三個字是在罵人：「千祈唔好亂講呢三個字，除非你feel到佢係先好講，人哋以為你鬧佢！」林家謙最後唱出《有你聽我的故事》為首場演唱會畫上句號。
