領展行政總裁兼執行董事王國龍「終於肯」宣布唔玩，先震動江湖，個個問點解，係咪「被退休」？ （新主席上場只幾個月，話唔定……），因佢享有如此超級高薪，冇理由肯放手，故可能因此才於記者會喊到眼腫。
新聞出街後，跟住廣大散戶又互問，咁，應該揸定沽領展呢？
不跟大行指揮棒起舞
小弟呢兩日真係俾身邊老友問到煩，最有代表性為肥B：「碌Sir，領展CEO拜拜，多間國際大行嗌買喎，包括摩根大通、摩根士丹利、交銀國際、花旗……。」
「B仔，大行講乜唱乜嗌乜，我從來唔理亦唔參考，班友根本大有利益矛盾。唔該你睇睇佢哋咁多年來叫乜叫物的，有幾多次中？」我真係冇佢咁好氣，跟埋班大行指揮棒起舞。
「喂，你6月30日公布開始沽愛股領展，原因之一為討厭王國龍作風，覺得佢作為最高領導自己棄糊不道德，故畫清界線。喂，?家佢走咾喎，可有回心轉意？」肥B咬住唔放，真係怕咗佢。
其實，雖然王國龍走，我會慢啲沽，但無意加碼揸。因領展另外兩大不利因素尚未消除：（一）整體零售業及餐飲業式微，領展商場大量客戶從事此兩行業；（二）安達臣地盤財務黑洞負擔深不可測，仍未有數公布。
新舵主成不明朗因素
小弟另有一擔心，因由現在到出年6月，理論上王國龍仍是行政大權在握，點玩都得，將領展玩起又得，玩殘都得，小股東絕對吹佢唔脹，視乎此君最後階段心態。此外，另有一不明朗因素為未知新舵主為何人，武功有多高強，道德水平又如何。
總結以上四點考慮，我暫時仍會按計劃逢高就沽，越高越沽，套現一半；另一半則按兵不動，搏一搏安達臣黑洞傷害有限。
良好願望是，領展新CEO及新主席能雙劍合璧，帶來新思維，令這間「香港人又愛又恨公司」重新踏上發展穩健的康莊大道。
總結，我對肥B的忠告——未來1年，不宜在投資領展上有任何大動作，因仍有大量不明朗因素，也看不出會有任何業績上的驚喜！
資深傳媒人 曾智華
