在香港人的血液中，有好多「文化」是沒法甩掉的，雖然時移世易，但大家的記憶一定會永恆存在，例如無綫電視黃金年代的節目。
過去60年，只要你活在香港，就必定受過TVB影響。傳媒人方面，曾經打過TVB工者也以十萬計，全部曾被此公司的管治理念洗禮。
小弟曾在1978年任職小小助理編導，短短14個月，烙下一生的印記。所以對一切無記的消息仍非常關注。
雖然大家對這間公司近年的表現，由節目水準、公司管治再到營運策略都頗失望，睇住佢由一間影響全球華人意識形態的廣播巨擘，變成部分香港人不再認同，甚至劃清界線的電視台，實在令人唏噓。
更令投資者痛心的是，電視廣播（511）曾於2000年創下81.5元高位，被稱為藍籌中的藍籌。但之後任何揸TVB股票的，無不一殼眼淚，因為連年來股價似食瀉藥，低處未算低，其股價於今年4月7日跌到變2.7元，問你死未！事實上，今天無綫市盈率，一片空白即冇盈利，反之負債纍纍，每年要「燒」的人工支出及燈油火蠟上億計，唔知點捱下去。
成交大增隨時「有事發生」
但不搞不搞還要搞，到底此電視台仍是香港傳媒收視最高、影響力最大的機構。套用一句政治術語——唔畀佢死得。既然如此，一定有「神秘力量」不停搶救，原因已遠高於商業考慮。
我也持有TVB股票，在3元多買入，因仍有點感情，也長期關注其動態，就做個小股東好了。
我的傳媒老友，不少早已心死，根本冇興趣再談論TVB，也不再關注其股價。我不同，仍日日追睇。發覺6月20日開始，此股突有異動，慢慢由3.24元炒上，7月初突然大力抽升，一嘢曾去到4.45元，成交量大增，肯定「有事發生」。
係乜？江湖傳聞甚多，我不便講，總之看來快有大動作出台了，而這個大動作，幫到無記幾多要慢慢觀察。但若有消息公布，肯定是正面的，到時……！由3元一下爆上4元多，是否有「春江鴨」提早開工？
資深傳媒人 曾智華
