港股投資者今日比較欠運，適逢美股周四假期，一次過反映以伊局勢擔憂及聯儲局議息冇驚喜嘅因素，想避險，冇得沽美股自然要向港股埋手，就當港股因為呢個技術因素而跌凸，恒指跌2%已經唔算甚麼大鑊嘅事，整體而言，投資者係冷靜嘅。
美股期貨暫時跌0.5%，亦唔算多。一方面因為聯儲局主席鮑威爾維持保守審慎言論，打定開口牌暗示最遲9月有可能預告減息（睇怕最遲11月減息），算係冇驚喜。以聯儲局近年作風，會喺最後一刻突然變臉放鴿，最快變臉放鴿嘅時間會係下次7月30日議息，到時睇埋特朗普同多國關稅點樣落實，估計大概維持向大部分國家收10%關稅，即係4月初之後冇再加稅，到時減息條件或許出現。
美國徵收10%關稅嘅效應由4月初展開，直至5月數據都未見物價出現顯著月率上升，如無關稅因素，通脹早已放緩，所以美國減息嘅條件較大機會喺9月或之前達成。
假如減息能夠喺9月發生，7月30日前後就可能美股展開升勢嘅時間，加上近期關稅憂慮令企業拖延招聘、減慢投資、消費者延遲購物，陰霾減退後，經濟動力會回穩，形成減息同時經濟慢增長劇本，同時AI帶來企業收入增長機會以及成本縮減憧憬，估計美股下半年表現相當唔錯。
至於返去以伊局勢，呢一刻其實並非一面倒向淡，仲有伊朗願意妥協嘅可能，而美國只會喺確保資本市場冇大動盪之下行事，最American style係美軍出動鑽地彈快閃攻擊福爾多、同時宣告行動完結，將壞消息同負面消息見底時間同時出現，極速縮短股市捱沽時間，Wait and see。
