有港女在日本居住5年，回流香港1年後近日總結心得，於當地亨盡禮貌服務後，卻始終喜愛港式服務，形容日本的服務員少了一點「活人感」。
回應的不少網民皆大有同感，並一語中的直言「香港係人情味」，且細數種種可能是粗聲粗氣的窩心感受。詳情見下圖及下文：
住日本5年回流香港 飽受禮待反愛港式服務？港女嫌日本少一點活人感逐張睇↓↓↓↓
樓主點評兩地服務態度
樓主本月6日在社交平台Threads以「日本5年回流香港1年」為題發帖，放上長文按行業點評港日兩地的店員服務態度。
樓主開宗明義地稱「我到而家都仲係好鍾意香港服務業嗰種不專業感（你無聽錯我鍾意香港式服務）」，接著按不同行業舉例點評：
– 某連鎖餃子店，個姐姐出餐唔小心成盤水餃跣咗落地
•如果喺日本，99%會表現出勁慌、勁失禮，係咁對周圍嘅客人申し訳ございません（對不起）咁；
•但係香港啲阿姐，係為咗化解尷尬，一齊笑到傻咗。
– 高級蛋糕店
•（香港）個哥仔好專業咁幫你Pack（包裝）緊蛋糕，同時半開玩笑咁同你講唔好咁信公司啲紙袋，跟手將個蛋糕放入兩層紙袋；
•如果日本，一定係好專業好有禮貌講一大堆敬語。
– 涼茶鋪
•同阿姐講想要凍嘅涼茶，佢一邊斟一邊阿媽式小Ｘ我，話女人真係唔好飲咁多凍嘢，第日你就知死；
•日本嘅小店姨姨，都會親切嘅，但應該冇咩可能會用鬧女嘅語氣。
– 生果鋪
•（香港）同姨姨講話唔使袋佢諗咗3秒，跟住繼續塞啲生果入袋，一邊話：哎！個袋俾埋你啦；
•日本的話，一般都唔會強塞個袋俾你，但可能遇到唔識應對嘅情況都會Hang（當）機。
樓主總結，「其實有時拘謹、禮貌又專業嘅態度都係好值得欣賞嘅，但有時亦正正因為咁，生活喺呢個地方，又會缺少一點活人感。或者我Ｍ底（受虐），但我覺得香港嗰種服務者同被服務者相對對等嘅模式我更欣賞」。
網民一語中的：香港係人情味
回應的不少網民皆大有同感，左一句「我都係」，右一句「明你」，並一語中的直言「香港係人情味」、「直接誠實唔扮嘢」、「Agree（同意），好親切」、「我都鍾意，咁做人先有互動」、「香港啲店員仲會搲下客吹水」，其他力撐樓主的留言包括：
•同意。有活人感唔等於冇禮貌，親切感比機械人式服務更值錢；
•我都鍾意港式服務多啲！！日本太拘謹，做客人都覺得唔自然……；
•完全明呀，香港真係生活感強好多，香港人嗰種靈活性同率直好正；
•以前去完留學，返到香港，直頭覺得我&（和）對方終於唔使再做戲啦；
•我都鍾意嗰種貼地煙火氣，有時被阿姨叔叔當女咁話兩句，其實仲開心；
•明你！率真vs（對）偽善，真係要喺兩地住過一段時間先明，否則一率都係風涼話；
•無聊吹水：香港嘅服務業會唔會就係最可以保留人性嘅嗰一群人？ 因為佢哋可以做返自己；
•我都係，有人會覺得服務態度唔好，但我會覺得大家似返個「人」先有生活氣息。太一絲不苟仲抑壓；
有人以更長的留言盡情表達自己的看法：
•我都係唔習慣日本式服務。唔係話唔好，只係我唔慣。反而香港呢種Ｘ口Ｘ面嘅我就好鍾意，可能我M底？我仲以為呢個世界得我一個咁黐線，原來是有同路人的；
•呢啲就係我鍾意香港人嘅地方，親切、直接、好心地。何況日本而家啲服務態度都差咗好多。識聽啲日文尤其Feel（感覺）到，日本人嗰隻有禮貌都只是機械人式，唔係有Heart（心）嗰種；
•我明，雖然大部分日式服務我都Ok，但唯獨一樣我真係好唔鍾意，就係去餐廳嘅跪式落單。真心有晒禮貌、講晒敬語我已經覺得足夠，但係跪喺度落單真係太比我階級感，我食餐飯、你打份工真係唔使咁樣；
•好明。日本做過Part time（兼）服務業，有對白背，咩情況講咩，根本上係播帶。Manual（說明書）冇講嘅問題，係絕對唔會幫人解決。講真，店員土下座（日本傳統禮儀）嗑頭道歉，都幫唔到個客，係情緒勒索個客，唔好再多嗲，勁憎；
•好明你，日本8年，而家計劃2、3年後回流。雖然日本有好多好好嘅地方，但做得日本公司耐，覺得自己好假，成日扮日本人將自己嘅情感壓抑，每日気を使う（ 體貼他人）、空気を読む（讀空氣，察言觀色）勁攰，心靈嘅監獄，而家為咗自己嘅心理健康，決定唔會太気を使う 。大部分日本人嘅好係好表面，只想好來好去，但喺香港自私嘅人真係自私，為你好嘅人真係可以兩脅插刀，有義氣；
•日本唔好得幾多，試過藥妝店俾咗錢佢，佢收埋擺咗一邊，跟住Pack（包裝）袋，佢有個同事同佢講完兩句俾咗啲嘢去冚住咗我啲錢，佢唔記得咗，又問我收過，我話我俾咗你，佢Ｘ晒面話我冇，好似當我搵著數，我指一指個CCTV（閉路電視）叫佢Check（檢查），佢搵埋個Supervisor（主管）（應該係）話我，結果佢哋自己拎開啲嘢搵返出嚟，兩個人都冇講句一句唔好意思或者對唔住，繼續Ｘ面，喺香港真係冇遇過，就算態度差都唔會知自己錯後一句Sorry（對不起）都冇。
還有網民細數具體例子：
•涼茶（鋪）真係好あるある（常有的事），啲阿姐又要問你凍定熱，話凍嘅話佢哋又會話，涼茶凍飲越飲越濕呀，暖啦好嘛，好正；
•噚日去街坊鋪買豆漿，$11/枝、$20/2枝，我要一枝，俾$20佢找，阿姐找張$10紙附送堅定眼神同微點頭示意唔使出聲（鋪入面好似有個平時看鋪嘅大叔），我用眼神回覆佢多謝；
•有次喺麥記叫4件雞翼加凍奶茶，個收銀姨姨同我講好咁叫啦！唔抵食、叫餐啦！我話我食唔晒，姨姨答「咁配粟米囉、粟米聽日食！」跟住佢自己已幫我入單。比著日本一定一定一定唔會咁，總之你叫咩我就落咩單。
有網民持相反意見 反問：吓
不過，也有網民對樓主的看法感到奇怪。指「香港邊度對等，Ｘ口Ｘ面，貼錢買難受」、「會唔會都係睇地方，大阪、東京呢啲大城市服務親切得嚟好機械式，但喺鄉村小鎮就感覺冇乜嗰種拘謹」。還有自爆在港受了不少服務員的烏氣：
吓，人哋對你有禮貌，你反而要啲咩生活感，你想R（搲）水吹咋？（在香港）我試過有次睇衫睇咗5分鐘，冇買到就俾人兜口兜面鬧；有次又問老闆娘可唔可以笠一笠恤衫，應承試穿後冇買就俾佢Ｘ面Ｘ；仲有次問個老闆件衫幾錢，我冇買，佢就話我其他衫買唔起；去茶餐廳食餐飯，叫侍應俾Menu（餐牌），親口講咗兩次，都當你無到。買件衫、去食嘢，都要受人氣，俾錢買難受！我喺日本根本唔會有呢種體驗。
資料來源：some.bxllshits1999＠Threads
相關閱讀：住港日女發表「離開唔到香港嘅理由」 提8大理由香港完勝日本↓↓↓↓
在港居住了5年的日本女子「Nami」，2024年前公開發表了「離開唔到香港嘅理由」，她提出香港在8大方面的優點，令她決定繼續留在香港生活。Nami在其個人Youtube頻道以其居港5年學來的廣東話，發表以下「離開唔到香港嘅理由」↓↓↓↓
