(曾智華)
周三快活谷之戰，最令大家開心的，為連鄭俊偉也畢業了，真替佢舒一口氣。
睇 下季冇新華籍練馬師上位了，說來好多人關心容天鵬能否獲得續牌。
假若小弟是馬會決策人，一定畀多一年佢。因「容大夫」有個「生命鬥士」的形象，季初健康情況本極不樂觀，幸而佢對自己冇放棄外，女兒更幫上一把。整個故事充滿親情及勵志，早成馬圈一個感人故事。
能夠由幾乎人生無望到以虛弱身體重現馬場，再慢慢重新站起，贏夠數畢業，絕對應該受到尊敬。故此，若馬會唔續牌，實在講不過去，也壞了自己形象，且看高層的決定了。
明天沙田再現高潮，舉行本季最後一場國際一級賽，十隻馬爭奪一千三百萬元總獎金。
跑平磅，最高與最低相差十二分，實在好難爆冷。以往曾勝二千四百米的有三匹，分別為「譽滿杜拜」、「當年情」及「有目共賞」，後兩匹贏的只是三級賽。「當年情」是上季贏，今季明顯滑落，配蔡明紹，機會不大。
「有目共賞」則不同，四歲，仍在不斷成長中，雖然此場屬最低分馬，但勝在實力未見底，故此必須拖佢一票。
馬王「遨遊氣泡」初跑此程，但觀其往績，也須尊重，尤其今季，四W兩Q，六戰全交出頂級表現，深不可測。
唯一外隊馬「譽滿杜拜」，則是全場實力最高！在去年9月後南征北討跑一級賽，由二千米至二千四百米，全入Q，厲害！
翻睇去年香港國際大賽二千四百米，佢跑第二，好似輸幾遠 ，其實是最後三百米大塞車，頂死，幸而騎師馬昆膽生毛，殺出重圍入Q。
面對香港次一級對手，今次肯定可以提款，一於做膽拖「遨遊氣泡」及「有目共賞」二重彩啦！
