曾智華
對香港馬會，我只有愛，沒有恨，但卻有很多意見，出發點無非希望佢搞得更好、更成功，令整個香港受惠。
例如上周小弟指出，馬會直接間接影響（操控？）全港賽馬節目，令其難以百花齊放，欠缺澎湃的創造力及活力，事事只一板一眼，主持個個慌死講錯 ，搞到娛樂性及吸引力大降，難以吸納到年輕新觀眾。這也反映在投注額方面，因沒有了一個成行成市，人人想參加的盛況。
不過，一單還一單，事實，馬會也的確非常積極開拓新客源，尤其希望吸引非馬迷，最成功當然是「快活星期三」。起初有人批評：「大佬呀，跑馬就跑馬啦，為乜搞咁多無謂花臣，樂隊演奏嘈喧巴閉，阻鬼住晒刨馬。」
係真唔係真？唔係！「快活星期三」已成功吸引不少國際靚人到場湊熱鬧，繪出一種「不單跑馬咁簡單」的嘉年華開心，完全融入現場氣氛。
馬會在這方面，真是不惜工本，剛又再下一城，與國際娛樂品牌XIX Entertainment建立策略性夥伴關係，一於「踩過界」，將賽馬建立成「國際娛樂體育」大型結合，希望為香港成功搞出國際賽馬旅遊，首炮望12月國際大賽招徠全球非馬迷湧來香港。
呢間XIX唔簡單 ，曾捧出Spicy Girls及創出《American Idol》電視品牌，也是碧咸夫婦的長期合作夥伴。
馬會出手咁重，當然信心十足，且看效果如何。
明天沙田賽事，我會替一隻馬打氣，正是去年9月受到嚴重創傷的「大數據」，此馬理應退役，但幾位馬主寧願耐心畀佢康復，再花百萬元養馬費也甘心。
對愛駒如此情深，我起立致敬，輸 九成九都買十蚊W！
