有港女昨日（14日）下午在社交平台Threads發求助帖文，引起網民高度關注，她表示，首日返工，被一名男同事以追求為名，「摸我Patpat，又摸我隻手」，她感到被非禮去尖沙咀警署報案，但報警後「屋企人話冇必要」，令她陷入自我懷疑「成晚冇瞓過」：「其實我係咪真係唔應該報警？」
網民紛紛留言支持女事主報警：「一定一定要報警！！！！！」「真心呢d情況係要報警！你冇做錯！」「報警做得對！第一日返工就拍pat pat，你唔出聲嘅第二日唔知做乜嘢喎。」
首日返工被「摸Patpat又摸手」 港女疑遭非禮家人反對報警 陷自我懷疑：成晚冇瞓過↓↓↓↓
該位女事主是第一日返新工，她未有透露工作性質，該涉事男子是她「同事」，雙方是「第一次見面」。
遇到懷疑非禮那刻，她感到非常徬徨：「第一日返工，第一次遇到呢啲事，當刻真係唔知點樣做好。」
男同事疑涉非禮後 短訊聯絡女事主
在帖文中，她公開了疑被非禮後，與涉事男同事的對話截圖。
截圖看到是該涉事男同事，在事後主動以Whatsapp聯絡女事主，這位男同事說：「hi，啱啱嚇親你，對唔住，向你鄭重道歉…」。
女事主回覆明確對於男同事的行為表示不能接受：「其實我唔鍾意人哋摸我pat pat又摸我隻手，好奇怪。」
男同事：因為你係我鍾意既type，想追你
男同事回覆說：「知道…因為你係我鍾意既type，想追你，如果你有男朋友既話…我就放棄了。」
女事主再向他明確說，不能接受身體接觸：「你想追我唔應該同我有身體接觸，pat pat係私密部位。」
男同事回覆：「知道（附嚴肅EMOJI），沒下次，對不起。」
「屋企人就話我冇必要報警」
女事主在帖文中表示，她覆完該涉事男同事的短訊後，便去尖沙咀警署報案，在落口供後，警員亦有「影低」這次通訊紀錄，以便跟進。
但報案後，「屋企人就話我冇必要報警」，令她「自我懷疑…成晚冇瞓過，其實我係咪真係唔應該報警」。
屋企人重男輕女？家醜不出外傳？
她說，家人認為警告或罵涉事者已足夠：「因為身邊好多長輩都覺得冇必要報警，叫我警告佢鬧下佢，搞到我懷疑自己係咪真係唔應該報（警）。」
有網民問她：「屋企人係咪重男輕女？……阿爸就認為家醜不出外傳……」，女事主回覆說：「畀你估中咗。」
告訴其他同事獲回覆：咁又唔使報警嘅
女事主又表示，有向其他同事反映疑遭非禮，但同事憤怒之餘亦認為不應報警：「我同咗其他同事講佢哋都好嬲，話要ＸＸ嗰條友，之後佢哋知道我報咗警就話：咁又唔使報警嘅。」
她又坦言「少少」擔心報警後，涉事男同事會報復：「咁呢其實我都有少少驚佢報復，因為聽講佢份人好似唔係好正常，佢喺樓上做侍應會拎把刀落去廚房磨刀…」
她表示會辭職：「已經唔諗住再去嗰度返（工）。」
網民齊撐女事主：一定一定要報警！！！！！
帖文引發熱烈迴響，大批網民紛紛留言力撐女事主報警，「一定一定要報警！！！！！」「應該要報警！正常返工係唔會有任何身體接觸，今日摸下只係試你底線，下次唔知會做啲乜……」
「報警做得對！第一日返工就拍pat pat，你唔出聲嘅第二日唔知做乜嘢喎，仲要叫你『妹妹』，我諗佢連你個名都唔知，完全係蝦你唔敢出聲。」
「一定要報！ 一睇就知係慣犯！一來保障自己，二來可以當係幫咗其他女仔！講唔使報警嘅，係針唔吉肉唔知痛，當事情發生係佢地身上，睇下會唔會咁！」
「你好勇敢，做得好好！唔好自我懷疑！」
「你做得好啱！呢啲好可能係慣犯，唔可以就咁算數，你小心啲好好保護自己。」
「你好勇敢，做得好好！」「報警係啱，唔好自我懷疑！」
同場加映：又一城連鎖餐廳分區經理被指帶頭性騷擾 女苦主爆返工 4 日性騷擾言行日日新 餐廳發聲明指零容忍 涉事者被停職候查↓↓↓↓
