《九龍城寨之圍城》鄭保瑞送給香港的情書丨頭條戲場

2024-05-09 15:00:00

鄭保瑞導演借一個地方去講一個香港故事，是一套好有溫度好有愛好有力量的電影。片尾曲是岑寧兒的《風的形狀》，「乘著那風的幻想，離別的故事，散落途上」，很有意思的安排，跟電影帶出的離不開留不低命題非常夾，配埋電影最後一幕，好感動，睇到想喊。留意返，九龍城寨清拆行動由1987年1月14日開始，至1992年7月2日結束，剛好歷時1997日。(上映中) 撰文:廖思慧

古天樂飾演的城寨話事人好似村長咁，阿婆病咗又好水喉冇水都好，一律關佢事。

林峯由頭帶到尾，一開始徬徨無助，陰功孤兒仔演繹得好好，呢幕劫持龍捲風當然冇好下場。

電影斥資3億元鉅製，盡力還原城寨，一磚一牆花了大量心機。

城寨四子嘅兄弟情好真實又好溫暖。

要贏一齊贏，熱血到黐線。

電影故事設定於1984年，亦是中英兩國簽訂《中英聯合聲明》的年份。因為城寨的存在由兩國角力而生，當香港前途塵埃落定，「三不管」的城寨亦失去其政治價值。導演在訪問中說，「呢筆聯合聲明，既決定了香港命運，亦是城寨歷史任務完結的一刻。」而林峯飾演陳洛軍就在那年由內地偷渡來港，為避開邪惡的黑社會大老闆（洪金寶飾），逼於無奈藏身城寨，因為城寨話事人龍捲風（古天樂飾）的一碗溫暖叉燒飯選擇留低，亦因難得被珍重而視城寨為家，最後甚至願意「死喺香港」。

林峯要重新學打，拍攝前一個月訓練拳擊，希望觀眾睇到有衝擊力。

劉俊謙首拍動作片已打得好好睇，仲要靚仔，真係不得了。

劉俊謙話首拍動作片好大壓力，好驚，唔係吖，你都做得好好，好叻呀。

介紹返，最佳女演員「魚蛋妹」(王尹菁飾)，佢一喊我就跟住喊。

郭富城飾演陳占，有個綽號叫「殺人王」，同龍捲風（古天樂飾）是老友，右邊擘大個口係黃德斌飾演的Tiger哥，同陳占隻揪冇咗隻眼。

在絕望中看見希望
電影好睇，極度推薦睇埋製作特輯，美術總監麥國強講述前期籌備的極級難處，要四圍去舊樓收集道具及傢俬，又要拆門拆牆，甚至瘋狂摷垃圾，冇得執就要重新生產。而觀眾睇到嘩嘩聲的場景，是以移動城堡方式興建，工程相當浩大。

為重建城寨，美指要四圍去舊樓收集道具及傢俬，呢間舊式牙醫，真嘅一樣。

執唔到舊嘢就要重新做包括舊雪櫃同舊汽水樽，全部嘔心瀝血之作。

戲中龍捲風的髮型屋，美術組辛苦地搜羅殘舊真窗框。

片尾冇彩蛋但有城寨人努力工作實錄。

片尾的空鏡可見導演的心思。

美術總監麥國強指電影的大型造景及陳設工程相當浩大。

城寨內好多窄巷，佈滿電線及水管。

製作特輯好好睇，九曲十三彎的城寨是以移動城堡方式興建。

電影片長126分鐘，主綫故事簡單，是光與暗的對決，而打鬥場口佔八成時間，所有男角打足全程，漫畫式打鬥非常精彩，特別讚好尾段盂蘭節復仇拍得好靚。對打得最多的林峯改觀，恭喜搣甩電視味；至於飾演信一的劉俊謙，由第一幕現身視綫已離不開。電影教你如何應付懂氣硬功，刀槍不入的敵人，就是忍耐鬥長命，對方必定會自食其果。最後，電影入圍康城「午夜展映單元」，導演將聯同古天樂、林峯、劉俊謙、胡子彤及張文傑出席影展，好好享受完場時的不絕掌聲，你哋絕對值得擁有。