近年好多時都可以見到好多由球會拍攝唔同嘅紀錄片，例如東北部嘅新特蘭同紐卡素、三冠王嘅曼城、年輕化嘅阿仙奴，都會拍出一啲更衣室嘅情況，從中可以見到教練嘅威嚴，同點樣去管理球隊，都會略知一二。
同時今年教練轉會窗已經好好睇，高普嘅離任，可能由飛燕諾教練史諾特接任；杜曹嘅卸任，可能由前曼聯領隊蘭歷克執教鞭；而沙維嘅失敗，咦咪住？沙維幾時失敗，由宣布自己來季唔教91日後，較早前巴塞官方又話沙維會繼續執教巴塞，真係令人摸不着頭腦。
要知道巴塞今季四大皆空，歐聯不敵巴黎聖日耳門，國家打吡全部輸俾皇馬，可以話認真失色。原本沙維就諗住出絕招，為咗保住名宿嘅光環，梗係話自己走啦，又可以谷一谷球員嘅士氣，一舉兩得！
點知巴塞真係要番佢坐鎮，其實原因只有一個，就係因為錢。巴塞呢幾季嘅財困認真誇張，又要賣球場名，呢幾季嘅簽人，大多都係免簽。同時又要諗新請番嚟嘅教練，轉會窗又要洗一筆，未必會成功，況且球會或許認為B隊教練馬基斯都未必有能力，咁倒不如搵沙維繼續執教。
巴塞真係好好笑，同我睇黃金一代真係有好大差別，如果今年有套紀錄片可以留低，真係會好想睇下，究竟沙維幾有威嚴！Willhappy
—–
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
