「鬼王」潘紹聰狠批中年男歌手疏於練習唱到出晒事 Zen前主音黃和興無意返港再戰樂壇

2024-04-01 15:00:00

「鬼王」潘紹聰(Edmond)日前到大馬拍網台節目，Edmond到步後即搵來已移居當地6年嘅老友，90年代樂隊Zen主音黃和興到甲洞區食宵夜，齊齊打炭火邊爐吹水講吓鬼故。52歲黃和興同太太Happy移居馬來西亞，𠵱家喺大馬做製作，商場展覽就交由太太處理。居於大馬豪宅區嘅興仔談到當地生活狀況，他說：「因為生活指數唔高，如果租平民化嘅甲洞區，2500馬幣(約4100港元)已能租到1200-1500呎單位，仲會包埋兩個車位，真係返唔到轉頭；呢度入油又勁平，打爆一部日本車仔只係50港元，全新國產車只需8萬多港幣；較好嘅基本身體檢查只係500馬紙(830港元)。」

「鬼王」潘紹聰去到大馬即搵90年代樂隊Zen主音黃和興，到甲洞區食宵夜。

蜆煲及兩人話題都好吸引。

兩人由鬼故講到生活。

黃和興好適應當地生活。

潘紹聰、黃和興喺甲洞食炭火邊爐，用炒蜆及上湯做鍋底。

睇到嘅香噴噴。

黃和興已習慣大馬生活。

黃和興唔打算為該位中年男歌星搞大馬騷，笑言留畀啲有熱誠做演唱會嗰啲搞啦。

潘紹聰對該位男歌手表現表示失望。

雖然唔少網民期待Zen再次合體演出，但興仔就堅決婉拒再唱，解釋因為多年前在內地浸在冰湖拍戲時凍傷過，搞到發高燒搞壞咗把聲，𠵱家把聲爛晒開始失控，而且年紀大，已冇體力配合到咁有力氣嘅歌，好易會出事。

(左起)樂隊組合Zen成員鄭偉鴻(低音結他手)、黃和興(主音)、鄧明輝(結他手)。

樂隊組合Zen主音黃和興、低音吉他手鄭偉鴻、吉他手鄧明輝、及鼓手關禮琛和幕後老友造造合照。

樂隊組合Zen出過幾張唱片。

6年前黃和興為無綫電視節目《流行經典50年》進行錄影。

黃和興太太Happy之前喺大馬商場內搞咗個鬼屋活動。

兩公婆生活寫意。

黃和興和太太Happy住喺大馬豪宅區，屋企有2000多呎。

黃和興變型佬。

喺雲頂遇上鄭伊健。

仲有黃貫中。

興你唔敢再戰樂壇。

興仔有班鐵粉。

揞名男歌手疑似杜德偉

講到唱歌出事，Edmond就揞名爆一件真人真事說：「有個(跟興仔)同年代嘅男歌手，因為我從冇聽過佢唱live，最近佢參與我朋友搞嘅一個學校慈善騷，聽佢唱啲經典歌，唉，一聽就陰功喇，唱到走樣，我估佢係疏於練習喇。佢遲啲仲開騷𠻹，死喇！」Edmond畀貼士指該位男歌手當年曾紅遍香港及台灣，而且好少歌手唱R&B，但姓氏就唔講得，因為冇幾多個有呢個姓，Edmond又忍唔住講少少說：「有，兩兄弟囉！」興仔即八卦追問：「個名係咪有個有木字呢？」語畢又話：「佢都唔後生啦，有6字頭，但仲keep 到個body嘅。」Edmond卻反駁說：「咁學友呢？佢都6字頭啦，仲唱到幾十場喎。」Edmond唯一同意呢位男歌手外形冇出事：「但一出聲就失望，因為係想聽返佢啲回憶。」興仔仲爆多啲啲：「呢度都有人問過我做唔做佢個騷？我就話留畀啲有熱誠做演唱會嗰啲啦，哈…其實唱歌係要勤於練歌，佢有一段好長嘅時間冇唱歌，呢啲嘢好難搞。」Edmond希望男歌手可以重振雄風：「佢應該跳舞都仲得嘅。」巧合地，62歲嘅型佬杜德偉(Alex)上月曾參與母校聖保羅書院慈善活動，稍後杜德偉更到台灣開巡演，跟潘紹聰所講的完全符合。