獨家丨《造星V》希晉拜拜容貌焦慮戒濃妝被插符碌入10強爆上第4名超勵志

2023-08-20 15:00:00

《全民造星V》的王希晉在決賽前接受《頭條日報》訪問，對被指符碌入10強未有被打沉，更叫大家等睇佢表演，然後決賽日獲評判Edward點名大讚有進步，埋單拎第四，足夠令Haters收聲。剛過24歲生日，在上周日的《全民造星V Summer Live 》場外獲Fans預祝牛一的希晉，坦言有容貌焦慮所以個妝越化越深，講明會順應民意的他，在上周五（18日）舉行的人生首個Fans Meet加生日P拜拜濃妝，請埋《造星V》老友Anson Wong做嘉賓，結他伴奏唱出多首歌曲，又打開心扉玩分享，飼養員（Fans暱稱)表示開心又滿足，𠱁粉能力極強。採訪:廖思慧、杜杜

除下唇環兼染回黑髮，希晉成個樣乖晒，據知唇環個窿都埋咗口。

希晉稱同ViuTV傾緊合作，希望有一個滿意offer，詳請就唔方便講嘞。

《Summer Live 》中希晉突然感懷喊出嚟。

希晉完成《Summer Live 》後在應援區打咭。

《Summer Live 》完場，Fans同八月之星希晉及KC預祝生日。

希晉在上周五（18日）舉行人生首個Fans Meet加生日P。

告別濃妝的希晉即刻變咗隔離屋啲哥哥。

兩人唱出多首歌，包括《窮小子》及《厭惡物圖鑑》等。

希晉在Fans Meet中，同Anson Wong唱咗兩人新歌《I’m going nowhere》。之前問到屬於咩曲風？希晉稱是淡淡憂傷嘅情歌。

希晉話冇諗過Fans Meet有咁多人參加，留眼濕濕Emoji表示好感動。

在《Summer Live 》開Show前搵希晉傾兩句，他正跟ViuTV傾合約中，未來希望Solo同夾Band同步並進，講到亨仔想組Band，預想成員包括佢，希晉秒答，「當然好啦，同佢夾得好開心。」再問係咪唔鍾意入男團?Keep住笑笑口的他強調鍾意跳舞，「只係我好大汗，跳完舞出晒汗成日要抹汗。」

《Summer Live 》中希晉有多個表演項目。

好鍾意夾Band的希晉提到Edward有私下畀意見，提佢可以唱得再從容啲。

一直有創作音樂的希晉，以藝名HEi-Z推出過EP《 Poizon 777》。

有問必答老實人
提到Kakit（鄧家杰）識玩Social Media所以接好多廣告，希晉戥對方開心，更老實透露自己冇廣告商搵，「如果有嘅話，當然好啦。」提議佢努力將社交媒體發揚光大，他說，「會呀，陸續拍啲唱歌cover，同KC拍啲跳舞IG reels希望多啲人認識我。」提醒他跳舞會身水身汗喎?希晉大笑回應，「reels好短㗎咋，30秒，唔會身水身汗。」

Kakit為主題樂園拍廣告。

希晉同KC會拍多啲跳舞IG reels希望多啲人認識。

問到有冇其它公司接觸佢?希晉繼續老實，「冇喎，冇其它公司搵我都OK，完咗節目對呢間公司有啲留戀，可以成班兄弟一齊。」再問《Summer Live 》有否酬勞，希晉擰擰頭，「但有少少車馬費。」有網民覺得佢個妝太濃，難得希晉繼續坦白，「化妝濃係我要求，因為我有容貌焦慮，想隻眼深邃啲，大啲，輪廓出啲，所以加多幾筆，會濃咗啲。」老實仔坦言會順應民意，因為有時上載素顏照或淡妝照，Fans特別鍾意，所以下次演出會淡妝啲。