23歲「A0女神」游嘉欣以半工讀形式完成城大管理學系學士課程，目前是全職演員，所以瞓身拍劇。日前她與TVB上位小生吳偉豪為林志華監製新劇《非常檢控觀》拍外景，《頭條日報》記者現場直擊，見游游被安排瞓地演出，笑住配合，表現專業。採訪：方騫平 攝影：鄧國良
游嘉欣及吳偉豪喺新劇《非常檢控觀》中佔戲頗重。
游嘉欣拍劇表現專業。
着上畢業嘅袍游嘉欣，以半工讀形式完成城大管理學系學士課程。
當日天文台發出雷暴警告，游嘉欣及吳偉豪(Ricco)到土瓜灣拍外景唯有爽手啲，劇情講述吳偉豪駕電單車追住「鐵騎士」游嘉欣要取回證據，搞到游游不慎炒車著地，由於Ricco有電單車牌，故揸電單車對他冇難度，飛車鏡頭則交由特技人代勞；反而游游就要由兩位劇組人員扶住車尾推她向前扮「行駛」。
劇情講吳偉豪揸電單車追住「鐵騎士」游嘉欣，搞到游游炒車。
吳偉豪追住「鐵騎士」游嘉欣要取回證據。
游游冇電單車牌，要由兩位劇組人員扶住車尾推她向前「行駛」。
雖然炒車著地一刻有替身，但游游都要補返瞓地shot，見她分別瞓喺鐵板及紙皮上被劇組拖行，接著又側身倒臥地上，劇組叫佢做乜就做乜，好聽話。游游不單唔怕受傷，反而愈拍愈起勁：「其實最初有啲擔心，好彩有頭盔，佢哋又試晒位，加上有鐵板隔住身體磨擦都安全嘅，所以好放膽拍，既然行唔到性感就做打女啦，我做開運動筋骨都鬆軟嘅。」問到完成學業後，演藝路上係咪想急起直追，追返TVB新一代上位小花席位？她大笑說：「好難追，先做好本份。」游游最想跟偶像鍾嘉欣合作，趁嘉欣目前忙湊仔，先練好演技。
瞓喺紙皮上被劇組拖行，游游覺得好好玩。
游游側身倒臥地上演出，零怨言。
吳偉豪唔介意被爸爸搶風頭
另外，Ricco對「升呢」做男一冇太大壓力，只會好好把握機會。劇中首次父子檔合作拍劇，他唔怕被爸爸吳大強搶風頭：「一齊開心Share，發揮父子力量，更何況佢經已紅過我，𠵱家喺街坊叫我做『大強個仔』，但都開心嘅，尤其佢又鍾意唱歌，爸爸多咗體會，會了解多啲個仔嘅工作。」
劇中吳偉豪父子檔演出。
吳偉豪「鐵騎士」型仔look出場。
游游係A0女神。
