胡杏兒日前為老公李乘德（Philip）慶祝50歲生日，邀請了不少好友出席，一眾好友難得見面，再加上現場又設有Live Band，氣氛當然更加高漲，身為女主人的胡杏兒當然唱吓歌助慶，不少賓客事後都將場內的片段po上社交平台，其中一段片見到有份出席生日會的林盛斌和崔建邦，high爆上台「鬧事」，結果被現場嘉賓大叫：「落返嚟啦！」林盛斌與胡杏兒合唱期間，更一度「嗌爆咪」，搞到胡杏兒最後「棄咪」！
【點擊睇胡杏兒喺老公生日會「棄咪」相】：
片中見到胡杏兒在台上準備唱歌時，崔建邦和林盛斌兩人突然自薦上台，殊不知被台下賓客「嫌棄」，直呼：「冇你嘅事呀，落返嚟啦！」搞到崔建邦有點尷尬地為自己打圓場：「我哋唔收利是㗎，唔落台㗎！」胡杏兒亦忍唔住「踩多腳」，笑住問：「你兩個混吉㗎？」崔建邦就話：「我哋兩個唔係運吉，係運氣啫，同Phil胡杏兒做一世朋友，我哋算得乜？我哋乜都冇，除做人情外，仲想講幾句嘢，以表我哋對你一家人心意。」胡杏兒笑指二人講幾句說話都值幾十萬，Bob笑說：「你咁講呢，太誇張嘞，20幾萬啫！唔好講咁多嘢，在場朋友畀啲掌聲胡杏兒，第二個係Phil。」
其後在另一段短片，見到Bob與胡杏兒合唱英文歌，不過「兩杯落肚」的林盛斌略有醉意，一度唱到嗌到爆咪，聲浪完全蓋過胡杏兒的歌聲，雖然在旁的崔建邦不停用手勢示意向林盛斌叫停，但他仍然不理會，最後她完全放棄讓Bob獨唱！
幸好林盛斌今次只屬輕微「鬧事」，有醉酒鬧事前科的他，試過在錢國偉婚宴上，在一班「古惑佬」台上唱《友情歲月》的時候突然衝上台，搶咪之餘仲爆粗，有指他辣㷫陳小春而被人追打，離場時又突然連咀扶他走的梁競徽，第二日林盛斌酒醒後知衰，承認「斷晒片」兼失控，向陳小春及錢國偉道歉。他又試過在張美妮的婚宴，居然對住大王安德尊大聲叫佢「收皮」，其後兩人被TVB安排合作拍節目，據講兩人在鏡頭後大打出手，結果被高層召去「深切了解」。
林盛斌又試過到張繼聰的家中團拜，有傳當晚他飲多兩杯之後，在張繼聰家中周圍食煙兼大聲講嘢，搞到大肚的謝安琪下逐客令，事後兩人否認此事，謝安琪稱當晚傾小朋友讀書傾到好夜，仲煮麵給對方吃完才離開。
