曾經有人形容港產電影已經一池死水，要「激活」實在不容易，不過電影作為一個夢工場，只要有夢想，任何事都有可能發生，誰也想不到，今年港產片走勢凌厲，改編自2013年發生的大角咀雙屍奇案電影《正義迴廊》，在最初不被看好的情況下，票房成績愈戰愈勇已接近3,500萬大關，取代《低俗喜劇》榮登港產三級片票房紀錄第3位！此片更加在網絡造成熱話，兩位男主角楊偉倫（阿卵）和麥沛東亦成為話題人物，連帶劇中不少角色都受到注意。
【相關文章】：
正義迴廊專訪｜麥沛東博盡真食「咖啡飯」 爆紅金句獲旁聽者指導：冇睇價錢就接拍
正義迴廊專訪｜莊韻澄獲周凱亮哥哥朋友私訊 封胸做虔誠基督徒更受關注
【點擊睇《正義迴廊》精彩劇照】：
阿卵早前接受《星島頭條》的訪問，戲中他與麥沛東的對手戲當然精采，但亦有不少人對他與莊韻澄飾演的表姐的互動有深刻印象。在張顯宗的世界內，表姐似乎是唯一真心對他好的人，阿卵亦認同：「張顯宗呢個角色係好怕畀人judge（批判），所以佢先封閉自己，而表姐呢個人物係從來都冇judge佢，就算同表姐自白殺咗人，佢都冇用judge嘅角度去批判，所以張顯宗對表姐係另一番感受，當然你都可以話佢利用表姐，又或者佢可能有啲反思，點解自己要咁樣做？喺佢表姐講完之後，心底裡面係有一刻後悔，唔排除有呢個可能。」
阿卵亦覺得，因為今次導演用了多角度去睇這件事，由犯人嘅心路歷程到家人、律師，傳媒的睇法，又可用感性角度去睇，實在有很多閱讀空間，當然不得不提，還有與飾演辯護律師的林海峰舌戰，更加是睇得過癮，阿卵本人亦讚不絕口：「睇見佢點樣撳低個犯而聽佢講，令到我有啲反應係好自然咁做咗出嚟！我記得有一次大家分析套戲嘅時候，我係會覺得吳冠峰呢個人係好明白張顯宗，喺張顯宗嘅世界入面，一路想有人認同同了解，但同時間因為要『面』而推開咗好多人，當吳冠峰踩入條底線，開頭係畀佢食住咗，冇得反駁，好嬲呢個人，但同時又產生咗一個關係，原來呢個人係好了解自己，而張顯宗其實一直需要有呢類人嘅出現，我有諗過， 如果吳冠峰早啲出現，成件事可能會唔同咗，而且吳冠峰係有諗過幫佢，亦係唯一一個相信佢嘅人，壞人都未必次次都講大話，係幾得意嘅關係。」再談與唐文奇的關係，阿卵覺得是兩人是互相影響：「咁樣先可以發生到呢件事，張顯宗有講過想自殺，而唐文奇就自殺過，點知兩個都衰咗，相遇到咪一齊去報復呢個世界，究竟係邊個講先？唔知，已經係羅生門，但係呢個相遇造就咗呢件事嘅發生。」
【點擊睇楊偉倫專訪相】：
今次是阿卵的演藝生涯所飾演的角色是最沉重的一次，思想上當然有反思和衝擊：「我同佢相似嘅地方係外型，我都有經歷個自卑嘅階段，覺得點解自己唔係高大靚仔，但係唔同嘅地方係，我屋企冇逼我做啲我唔鍾意做嘅嘢，佢哋會擔心同關心，好似我同佢哋講話想做演員，佢哋會擔心我究竟搵唔搵到食，不過都好尊重我自己想行嘅路，所以成件事係好唔同。」他又說：「始終係群體社會，如果你身邊嘅人或者外界點對你，係好影響諗法，當然，佢做咗呢單案，同佢本身性格，過唔過到自己係好有關係，除咗呢樣外，係咪可以對人好啲？人始終冇一個超能力知道對方諗乜嘢，只係估人哋諗乜，但係喺估嘅過程入面，係咪可以留心多少少？又或者喺過程入面，可以早啲表達多啲，而唔係『監粗』覺得好就畀你，呢個過程係好難，年輕人喺成長過程係自我，喺度熱血緊，好難去聽啲前輩講佢嘅經歷。」
眼前的阿卵看似活得輕鬆自在，但他曾經有執着自我的時間，幸好身邊有前輩、朋友安撫，最後總算捱過來：「我讀戲劇嘅時候，有老師同我講，做演員要好open，聽人意見，唔好諗住自己係啱晒，演員嘅工作係做人，而做人係有好多唔同嘅諗法，係咪你嗰個諗法先係最啱呢？唔一定，好多嘢係講緊磨合，磨合就係open。我去做一套戲，當然有自己睇法嘅一面，但係呢個睇法係咪捉得咁死呢？點樣先可以有最好嘅方案？就係要好多人配合出嚟，所以放低自己係演員好重要嘅一課，另一課係接受自己不斷撞板，接受自己嘅失敗，身邊有朋友同前輩扶返起你，慢慢就會好清淅，每次都盡能力去做，當新嘢咁去做，我相信大家一齊認真去做一件事，觀眾會感受到你嘅心，體會到你嘅熱誠。」
當日拍完電影後，一直都未有機會認真細看，事隔多時終有機會再看，阿卵笑言當時確實很陰沉：「雖然拍嘅時候，體力同心理係好辛苦，但係非常之爽，因為呢套戲係好多人嘅第一次，例如我同麥東（麥沛東）第一次做咁main（主要）嘅角色，導演係第一次拍長片，攝影師、服裝都係第一次，變咗成班人嘅拼搏同追求，真係好癲，只要有一個部門唔滿意，即刻再嚟，大家嘅追求係要最好！」但他承認，初初接拍時有擔心：「嗰陣梗係近水樓台問白只，話晒佢都做過殺人犯，佢話唔使擔心，係一定會，不過都提我，拍嘅時候要同個角色做功課，等自己有個意識係拍緊戲，係做緊一個角色，拍完冇乜特別方法，因為好快就拍《大叔的愛》，沉重心情慢慢就冇。」
攝影：黃頌偉
髮型：Louis Tse@Number8 Salon
化妝： Yannis Yip
服裝提供： O.N.S clothing
