日前為許紹雄扶靈的歐陽震華（Bobby）形容對方是藝訓班第一期大師兄，兩人結緣始於早年合拍劇集《賭場風雲》，他與許紹雄、苗僑偉合演老友。提到《賭場風雲》，Bobby受訪時憶起憑該劇入圍競逐《艾美獎》「最佳男主角」，在出發赴美國頒獎禮前不幸「生蛇」（帶狀疱疹），並留下兩個深洞，刻骨銘心。撰文：娛樂組、攝影：朱偉彥
歐陽震華痛到醒
65歲的Bobby近年專注內地發展，不知不覺入行43年。他訴說出發去美國頒獎禮前的「生蛇」經歷，他表示：「嗰排好忙，拍緊《法證先鋒2》，可能唔夠瞓又食無定時，臨上機前一、兩日就覺得塊面有啲暗瘡，但唔似一般暗瘡，好似有電咁！當時冇理會。上機之後，喺飛機開始痛，有水出嚟，喺飛機完全瞓唔到！十幾個鐘機程，一瞓着就痛醒。」
歐陽震華講唔到嘢要取消訪問
Bobby與太太抵達美國，下機後立即求醫，醫生告知他是「生蛇」，「痛到不得了！好似千支針同時插入你塊面入面，48小時內我只係勉強食咗一碗粥，每次咀嚼都痛到崩潰。」他甚至婉拒受訪，「根本講唔出句完整句子。」他非常傷心，「辛苦做咗咁多年，覺得呢個成績係上天畀我嘅獎勵，咁大個仔最威今次！」卻可惜「生蛇」，他形容，雖然病發期不算太長，但最大後遺症是厚痂脫落後傷口深入真皮層，臉上留下兩個深洞，「係兩大個好深嘅洞，我仲記得放一粒橙核落去係唔會跌返出嚟。」續指當年醫美未盛行，就去做手術及磨皮，「要聯針，聯返埋佢，又用laser磨皮，磨到成面血，毁容啦！磨咗兩次先平返啲咋。」
歐陽震華險盲
Bobby續稱︰「醫生解釋生得好近眼睛位置，隨時有機會失明！」他指是不幸中之大幸，三星期左右後康復，又大爆一位仍有拍《愛·回家之開心速遞》的藝人，受「生蛇」折磨了兩年，「痛時時唔痛，好痛苦！」Bobby奉勸別掉以輕心，皆因「生蛇」沒先兆，且生過蛇的人未必有免疫力，「打蛇針係其中一個預防方法！」最後談到許紹雄，Bobby祝福他去到想去的地方。
