曾智華 精彩人生自己創
做飲食生意者，當然希望越旺越好，故此，十之八九皆想米芝蓮推介、飲食媒體稱讚、大眾點評報道，又或\u22ef\u22ef出現在小紅書。
真真唔好意思，小弟搵食，除參考米芝蓮推介（僅僅參考），其他甚少閱讀。點解？因無法肯定「水分」有幾多。
我寫飲食報道（不敢稱食評）N咁多年，結識無數這方面的業內人士，包括傳媒及經營者，當然知道在介紹酒店及不同級數大小食肆的領域內，可以有好多「彈性」。
例如，去年有條網上片扮街坊讚賞一間餐廳，喂喂，正在家居附近，三年前幫襯過，只此一次，再無交易，因水準甚差。但條片幾個唔多識做戲的街坊，竟讚到天上有、地下無，真係肉麻當有趣。
結果，條片有冇用？有，一個星期\u5569，之後路過，繼續拍烏蠅。
前晚與一近日冒起得極快，可稱火紅的食肆大廚C哥閒談，佢講出一點與別不同的看法。
「碌Sir，我從不想在大眾點評或小紅書出現，並非對宣傳冇興趣，而是客路唔同。」
C哥指出，做食肆，定位好重要。佢早早定自己餐館走中檔消費斯文一族生意，希望客人以行政人員、專業人士（律師、醫生、教師\u22ef\u22ef）及公職人員為主。所以，要控制客人的背景，不能太雜，否則會趕走目標客。
乜叫「雜」？香港人一定明白。例如，C哥店內早前來了一群江湖人士，兩杯到肚，大聲猜枚，搞到其他客人露出不安神情，速速埋單。之後，凡呢班友訂\u67b1，C哥指示經理一律推之。
另外，睇小紅書及大眾點評而來的部分客人，背景也甚「雜」，加上多有酒後喧嘩習慣，亦會嚇走正常熟客，故此，當人人都恨在小紅書曝光時，C哥卻Say No。
