陳懿德（德德）在《聲秀》決賽的表現瘋狂「甩轆」，被網民連數7宗罪︰包括宣佈季軍時讀錯人名；在第二回合參賽者獲得評判分數時，將「藍燈」、「紅燈」顏色搞錯，差點令評判投錯票等──雖然德德事後出懺悔帖文道歉，但她今日（15日）為「聲秀畢演唱會」發佈會擔任司儀時，又把演唱會舉行月份12月講錯成11月。
陳懿德犯錯羅天宇慰問
受訪時，德德指今日情況好了點，續稱在《聲秀》決賽犯錯後，不知道如何面對大眾，坦言有為失誤難受，「有喊過」，對於表現並非預期：「頭幾日收到好多訊息鼓勵，有係導師，或者幕後人員，印象好深刻係收到30幾個幕後嘅訊息，話『 你犯錯唔緊要，最緊要唔好失去信心』。我當時有諗係咪要咁樣退休？多謝大家仍然信任我，我覺得係時候要振作，去報答大家嘅愛。」德德經此一疫，「覺得自己好幸運，患難見真情！」至於緋聞男友羅天宇有沒有關心？她說對方有問候。是鬧還是出於關心？德德說：「佢點會鬧我？其實唔止係佢，節目組冇一個人鬧我，佢哋知道我好怪責自己，冇辦法原諒自己，先鼓勵我。（羅天宇有冇問你決賽嗰晚係咁提起佢？）佢冇，佢話覺得幾搞笑。」
提到她剛才也有講錯，德德形容：「係有一、兩次口誤，我都即刻補飛，犯錯唔緊要，最重要係面對自己嘅錯誤，下次做好佢。」她透露稍後為周年晚宴、TVB台慶擔任司儀。怕再跌一次？她即時說：「唔好咁講啦！今次嘅過失係一次寶貴經驗，反省一下點去拿捏壓力、動力嘅中間位，同時無忘初心，要做一個更加謹慎、沉穩嘅MC！」她感恩沒有因此而失去客戶，並再次重申同事、朋友等對她的鼓勵，「睇到佢哋眼神好有愛，叫我加油。」
陳懿德為「聲秀畢演唱會」發佈會擔任司儀，把演唱會舉行月份12月講錯成11月。
陳懿德︰「犯錯唔緊要，下次做好啲！」
陳懿德今日任司儀又講錯嘢！
陳懿德早陣子在 《聲秀》決賽「甩轆」，見證人間有愛。
錯有錯著，陳懿德主持工作接踵而來。
「聲秀畢演唱會」發佈會人多勢眾。
陳懿德早陣子在 《聲秀》決賽「甩轆」。
