叱咤 903 主辦《拉闊音樂會 Most Wanted 鄭秀文 x 張敬軒》將於 11 月 1 日（星期六）在亞洲國際博覽館 ARENA 隆重舉行。鄭秀文（Sammi）與張敬軒（Hins）首度攜手登上拉闊舞台，進行一夜限定的「時空約會」，穿越不同維度，以音樂對話，激發前所未有的拉闊火花。今次拉闊亦特意加入票選環節，讓樂迷親自決定演出內容，打造真正屬於樂迷的「Most Wanted」舞台。
全新造型驚艷曝光 頂級製作團隊加持
拉闊音樂會第二款主題造型今日正式曝光，此款造型以「光」為概念，Sammi 與 Hins 分別換上螢光粉紅及淺綠色型格西裝，展現出獨特的個人魅力，在拉闊舞台上散發耀眼光芒。是次拉闊更由頂尖製作團隊操刀，二人御用演唱會音樂總監 Johnny Yim 及梁基爵強強聯手，為當晚的音樂重新設計及編排。兩大樂隊班底亦將攜手演出，碰撞全新火花，呈現一加一大於二的效果，將拉闊舞台極致升級！
樂迷掌舵參與互動 票選最渴望現場聆聽的經典
Sammi 與 Hins 現正密鑼緊鼓為今次拉闊籌備之餘，亦準備了驚喜互動環節，由樂迷親自投選演出內容，打造真正屬於樂迷的「Most Wanted」舞台。二人各自揀選五首經典作品，讓樂迷投選出心目中的「Most Wanted」歌曲。獲得最高票數的兩首作品，將由二人在拉闊音樂會現場傾情演繹，實現樂迷心願。投票活動由今日（29日）中午 12 時起至星期五（3日）中午 12 時，Sammi 的五首作品包括《親密關係》、《默契》、《隔著玻璃》、《男仕今天你很好》及《很愛很愛你》，張敬軒則揀選了《P.S. I Love You》、《披星戴月》、《留低鎖匙》、《明明他已離開你》及《形影不離》。
互相欣賞惺惺相惜 音樂會幕前幕後火花不斷
Hins 坦言揀選歌單時面對不少難度，因為二人擁有豐富的音樂作品，實在難以取捨，所以邀請樂迷一齊投選心目中的「Most Wanted」歌曲。Hins 同時大讚 Sammi 十分專業：「Sammi 從未畀我哋任何前輩嘅壓力，而佢嘅前瞻性讓我哋睇得更遠。佢唔係將難度或技巧放喺第一位，而係著重嗰件事 handle 得好唔好，效果出到嚟點樣，同埋好唔好玩。大家一有新嘅 idea，佢就會表現得好雀躍。」
Sammi 亦大讚 Hins 對樂壇有使命感：「見證住佢喺樂壇不斷蛻變同成長，我知道佢一定付出咗好多努力。我唔相信僥倖就能走到今日，只相信持續努力同堅持先會有呢個成績。佢平時對樂壇、對新人嘅關心，已經超越咗歌手嘅身份同責任，所有人都睇得到佢身上係有一份使命感。」Hins 則十分感激 Sammi 的提攜：「我覺得好多嘢都喺 Sammi 度嚟，我第一次出埠做演唱會嘉賓，就係去 Sammi 喺馬來西亞雲頂舉行嘅演唱會。Sammi 一直關顧樂壇，提攜後輩同埋新人，我希望這份傳承嘅精神一代一代傳落去。」
