曾智華
由細到大，我都喜歡食酸\u5622及辣\u5622，尤其食蝦餃、燒賣、腸粉及炒粉麵，更是無辣醬不歡。個人認為，全港最正廣東辣椒醬，為紅磡觀音廟對面的「明德醬園」出品，質素彈離個個話No.1的余均益。
明德出品，勝在並非Mass Production，只自家製自家賣，真材實料，用辣椒、米醋、蒜肉、生油、鹽及糖混成，入口便知龍與鳳，絕非超市大路貨染色醬可比。
不過有點弊，因此乃老字號，獨一無二，主理人年事已高，下一代無興趣接手，隨時慢慢蒸發。所以我家長期掃定半打，食得多久就多久。
講到酸辣，小弟最愛酸辣湯，凡到上海菜館就點酸辣湯，發覺高低質素可以差別極大。
渣的，唔夠酸又唔夠辣，兼且水汪汪，出品者孤孤寒寒，唔捨得用料，一啖入口立即冇晒癮。好的剛剛相反，濃稠有致，用料又足又靚，全部手切變幼絲。
暫時個人判定，紅磡、土瓜灣、九龍城一帶，最正斗的酸辣湯來自一間小店，位於土瓜灣炮仗街38號的「上海美食之家」，鋪仔細細，由「女鐵人」梁太一腳踢。
梁太的故事很多人知，丈夫腦退化不能工作，女兒則有多少智障。梁太每朝先帶丈夫到社區中心日託，再帶女兒到弱能人士工場上班，然後即到街市買材料，回舖開工。主打是酸辣湯、水餃、雲吞、粢飯及炸排骨。
基於其背景，小店在此開業兩月（之前在江西街），已有區內婦女網上群組大力宣傳支持，輸送人間溫暖。
問梁太點解佢碗酸辣湯特別好味？
「碌Sir，冇乜花巧，首要用好料，包括木耳、鮮竹筍、豬皮及豆腐切絲，關鍵在推個靚芡，然後加蛋花令其美觀，當然酸辣味要調校恰可，就此而已。」
