29歲的羅毓儀（Yuki）在TVB真人騷《女神配對計劃》中與林俊其（Kris）互動升溫，兩人先後被拍到街頭拖手仔及「膊頭貼膊頭」如情侶般坐港鐵，反觀對另一位追求者海淦清（T.Max）劃上防線，態度鮮明對比引發網民熱議。儘管《東周刊》踢爆Kris有「港姐殺手」封號，更揭出大籮緋聞舊史，Yuki卻展現包容，語帶堅定維護說：「每人都有過去，我𠵱家偏向相信佢。」另外，Yuki接受《星島頭條》訪問時，含淚交代拒愛T.Max原因，強調大家僅限是朋友。 採訪：方騫平 攝影：朱偉彥 場地：Ko’s Coffee@爆炸戲棚
羅毓儀完成真人騷《女神配對計劃》後感觸甚深，表示節目後成長了許多，尤其見到不少愛錫的人，要比以前堅強。Yuki坦言因不擅社交，拍攝初期感到焦慮、緊張和不安，感到有壓力。但隨節目發展，她與Kris互動頻密，接連被拍到拖手行街，再「膊頭貼膊頭」坐港鐵。對此，Yuki急忙澄清誤會，唔係拍拖關係：「佢見到架車轉入嚟就拉住我一段路，我哋冇事發生。直至大家混熟咗，咁有時放工咪會一齊坐車走。」雖然否認戀情，Yuki卻對Kris讚不絕口，更自爆曾因對方心動：「玩『壁咚』遊戲嗰陣有觸電感！」她詳述Kris暖男舉動：「拍攝時見曬到疑似中暑頭痛，佢即時喺行李內拎出成藥，送上關心話『我都驚你會唔舒服，所以帶定好多藥傍身！』除此之外，佢仲為我準備麻糬波波、暖包及自家製黑糖水，見佢嘅舉動，唔係純粹為做個真人騷，行動上真係表達誠意，絕對有加分！」更笑言自己零回禮：「哈！我唔擅長照顧人，反而完全冇為佢準備啲乜！」
「我都拍過幾次拖」
面對《東周刊》踢爆Kris有「港姐殺手」封號、曾力追梁超怡及陳曉華，和港姐王菲又傳過緋聞，Yuki展現包容：「我有問過佢，佢解釋係誤會，正如同港姐王菲都好老友，玩遊戲輸咗先打畀對方。」她更搬出「每人都有過去」金句解畫：「空月來風未必無因，佢同啲女仔的確係多咗啲『誤會』嘅，但相信每人都有過去，我都拍過幾次拖啦，就算佢拍節目前有愛情關係都算正常喎，我重點放喺佢現時係點，多觀察佢嘅行動，要提醒自己唔好咁易受人影響判斷，睇得評價太多只會卻步，相信時間會證明一切，我𠵱家偏向相信佢。」
提到Yuki以城大一級榮譽畢業，Kris中四曾留級，兩人在學歷差距，Yuki反駁道：「能力唔可以用讀書衡量！睇佢近年演《反黑英雄》番茄、《刑偵12》樂仔，明顯花過功夫。可能讀書唔叻，但戲劇上有獨特眼光，正如我唔擅長運動。」她更透露家人態度：「屋企人只在乎我開心，最擔心負面留言影響我。」對於被指她偏心Kris，冷待T.Max，處事手法不當勸她退賽，Yuki認為大家睇得太投入及太肉緊，衍生有好多種不同的聲音，「特登偏心就真係唔會，但有機會偏心咗自己都冇為意，因為喺拍攝過程中，冇可能對所有人嘅感覺都一樣。」又委屈地解釋多次拒絕T.Max，坦言早察覺冇火花：「『壁咚』環節已經感受唔到戀人感覺，如果再繼續有親密接觸，最後結果更差，係咪玩緊佢呢？唔畀假希望人，早啲直接講清楚更好，現時同T.Max只限於朋友上了解，大家仲係朋友。」
養埋對方就咪搞
Dry咗逾一年的Yuki說到擇偶條件講求「對等關係」：「單方面付出會形成心理唔平衡，錢方面非完全唔睇，要為組織家庭生兩個小朋友打算。（Kris財力上未符合要求？）大家都係行內人，知道對方收入幾多，最好各自有夢想，有上進心與內涵，過去4段情皆因『步伐不一致』分手。」她自認事業型女性：「𠵱家係搏殺期，冇期望另一半養起我。但如果要養埋對方就咪搞，尤其做男人要負責任！」而她將《女神配對》經歷化作創作靈感，推出出道以來第一首情歌《女神之翼》，表達憧憬的愛情。
