香港電影業面臨寒冬，戲院結業、演員冇戲拍又冇戲上，暫時拍板的只有由《毒舌大狀》吳煒倫執導，黃子華、鄭秀文主演的喜劇片，而多年前拍攝的電影版《尋秦記》則聞得將於明年元旦上映。有見及此，各界各出奇謀破解困局，當中就包括導演陳詠燊（Sunny）最近埋首舉辦的「光影邊緣—香港電影的臥底世界」展覽，「臥底」主題是戲劇化呈現，「餓底」則是現實，要食飯就要搵方法。談到香港電影未來，其展覽以《英雄本色II》的英文片名作結︰「A Better Tomorrow」。撰文︰李志宏、攝影︰譚志光、陳詠燊服裝︰CLUB MONACO
臥底片的光輝歲月
陳詠燊（Sunny）2000年投身影圈，編劇出身，近年做導演拍戲有賺，他也曾是「逆流大叔」，10個煲9個蓋，兩年多零收入，離開過、又輾轉回到他最自在的本業。最近Sunny埋首「光影邊緣—香港電影的臥底世界」展覽，大館找Sunny任展覽創意總監及聯合策展人，他說︰「大館本來就係警署。初頭就諗犯罪電影題材，再收窄範圍，我扔咗7、8條橋出嚟，唔知點解呢度咁多臥底片，亦最能代表香港電影嘅發展軌跡！」展覽中的8套臥底片與戲中10個場景包括《邊緣⼈》（1981）、《龍虎風雲》（1987）、《英雄本⾊ II》與《辣⼿神探》；《龍在邊緣》、《無間道》、《⾨徒》及《掃毒》（2013）。Sunny表示：「先決條件係流行程度，市民入嚟睇先有共鳴。電影評論家認定《邊緣人》係香港第一套臥底片。仲有年輕人霸氣講《門徒》對白『一人一罐魚子醬』！《掃毒》2013年上映，未係喺屋企撳遙控器就有戲睇嘅時代。我想勾起大家對港產片嘅熱愛，跟住出多啲街啦，慢慢入返戲院。戲院睇戲嗰種震撼，就算屋企電視機幾大部都彌補唔到！」
搞作多多曝光率高
串流平台打擊戲院生意，消費模式轉變等因素，令今年市道特別疲弱，香港電影人近乎冇戲開，Sunny坦言：「既然阻止唔到洪流，就搵方法繼續營運。戲院始終有吸引力，當然形式會變，要轉型。我成長年代，電視、電影演員分得好開，依家條線好模糊。」正如「臥底」有多重身份，Sunny集導演、編劇、講師、作者、主持人等角色一身。Sunny經常現身電影傳媒優先場，YouTube上亦經常看到他的影片，IG社交網更是頻密更新，中生代導演中數他曝光率較高，Sunny笑言：「性格決定命運，我多心。返嚟做電影前（《逆流大叔》），我出書要宣傳，開始營運社交媒體。依家個trend係乜嘢？就係冇trend，用自己方法留低。電影呢一行，我信緣份，好似我做咗《導演．門》，建立咗人脈，當時做主持人嘅connection又幫到呢個展覽。」
睇吓摸吓親身感受
其實Sunny未做過策展，與「臥底」似乎扯不上關係，「我寫《飯戲攻心》個故仔就係講『你暪我暪』，同臥底片一樣。」展覽在7月底開幕，Sunny透露：「我哋3月傾，4月決定題材，仲有約訪問、拍片、剪片、文案展示等；5月埋晒班，6月砌場景，7月中運入嚟大館裝嵌，再執細節。美術指導係合作無間嘅張蚊，扔晒我想要嘅嘢出嚟，佢平衡美學角度、場館實際上點樣執行兩方面。」與各部門協調，講求的是機動性，Sunny坦言：「初頭我諗，同做導演分別會唔會好大？做落去就發覺同拍戲一樣。我只要捉實story telling，主題唔好甩，就放手畀團隊發揮！」去展覽，看得最多是「不要觸摸」告示牌，這裏部份展品則是可以摸，那張導演椅更可坐上去拍照，Sunny說：「我好珍惜live performance，尤其喺AI時代，演唱會、舞台劇係代替唔到。呢個展覽，呢批實景嘅細節，唔係喺屋企睇screen可以取締，要嚟睇、摸吓、親身感受。」人人都說AI，對此Sunny認為：「依家AI gen設計圖好快，一目了然，唔使好似以前咁口同鼻拗。」消極的人看到互相蠶食，積極的人則看到共存。
做大個餅Run落去
「近幾年我好信緣份！」Sunny笑說，好禪？該是雨過天青的領悟，他之所以叫Sunny原來有段古，「我細個鍾意睇《跳飛機》Sunny哥哥，爸爸話就咁改啦！我有家庭，有個仔，更加要樂觀。」他畢業於演藝學院，甫入行就跟馬偉豪學習，當月薪編劇，4年來寫了10多齣戲，「前輩話，每個人有15分鐘，咁之後生活點過？呢行冇蜜月期。」不想被淘汰的Sunny涉獵不同範疇工作，投資技術，2006年左右合拍片興起，他未有北上發展。沒戲寫的時期，Sunny兩年多零收入，靠太太撐住頭家，於是轉行做馬會電視節目監製，離開電影圈10年。「真係有賭未為輸。」後來吳煒倫找Sunny寫劇本，他發覺自己在這方面依然得心應手，搵機會重操故業，做編劇是為了踏上導演路。之後執導電影《逆流大叔》呈現香港社會問題，嬉笑怒罵，一幕幕「獅子山精神病」引起共鳴，Sunny亦深有體會：「千金難買少年窮，捱過你先會識珍惜！」幾個月前Sunny度劇本之際，便收到大館來電邀約，「我依家心態係，無論乜嘢project，我啱做會爭取，唔適合做，都介紹其他人畀你，幫你度掂佢，總之唔好錯過任何機會，做大個餅，大家run落去！」
