(曾智華)
7月1日，馬照跑，舞照跳，各適其適慶回歸。小弟邊度都唔去，下午自關房中，開冷氣，歎紅酒，慢慢刨馬場場買，希望有得嗌啦。
季尾已到，展望將來，有兩件事肯定發生。一為籃球博彩通過，二為從化賽馬開波。
籃球博彩政府早打晒開口牌，做足工夫配合，由上而下，先在今年《財政預算案》提出，再做「公眾諮詢」（點解用引號？你話呢！），顯示九成四人「支持」。
以今時今日香港財政狀況，真係拗都多餘，\u55f1\u55f1聲通過啦。
另外，從化賽馬也如是，部署經年，難道用天文數字搞個香港馬匹度假中心咩？當然是劍指內地開放賽馬，搶先霸住呢個山頭啦。
幾時真正落實？相信快喇。到時，應該不會計入香港賽程，而是包裝成「境外賽事」，呢呢，咁到時就彈性大得多\u561e。
可能起初一月一次，再變一周一次，正式常規化，做埋中港匯合彩池方式，如此，馬會彩池收入大增，等於政府稅收及善款也大增，各種教育福利事業，瓣瓣有大把水湧入，真係諗\u5413都興奮（有需要，抽一大筆水畀中央政府又點話），總之，馬迷心甘情願「捐輸」，外人不得依牙鬆槓！
今日七一慶回歸，當然馬照跑。小弟策略，決定撥出一百一十大元，每場選隻靚名馬買W，完全唔刨，睇睇戰果又如何。
由高班賽數起，包括：「健康愉快」、「實現夢想」、「共同輝煌」、「明亮天下」、「凝聚美麗」、「天天友福」、「好運年」、「朗日自強」、「飛躍成就」及「香港精神」。
另外有幾隻馬，無論點，小弟都堅決不買，因唔喜歡個馬名，包括「巴閉佬」、「晒冷」及「不羈」。唔好問點解，總之就是道不同，唔要。
