由張衞健（Dicky）、許志安、蘇永康（阿公）和梁漢文（Edmond）組成的BIG FOUR，將於8月9至11日舉行一連三場紅館演唱會，相隔13年推出新歌《赤子們》並拍攝MV，邀得金像獎最佳剪接李謙明擔任MV導演，四子在鏡頭前後盡顯默契連爆笑料，MV其中一幕，四子以包揼方式分成兩隊大玩足球機，Dicky和安仔大戰阿公與Edmond，玩得非常投入，Dicky更激動得舉起足球機的一邊，笑言是「三十六計，搬為上計」。阿公、Edmond最終以15比8獲勝，阿公更獲封「神射手」，他指着Edmond假裝生氣說：「呢個衰公最初Part到我時嗌『哎吔』！」Edmond笑言：「最唔想Part到你囉，但估唔到你係呢場波嘅『神射手』！」
撞爛古裝街玻璃
BIG FOUR在鏡頭後同樣玩得開心，安仔等埋位時除去西裝外套抖涼，阿公立即拿起攝錄機拍攝他強壯的手臂，又一齊偷伯準備中的Edmond，現場笑聲不斷。此外，安仔的歌迷還精心準備應援食物給台前幕後，非常有心。四兄弟勾起不少難忘回憶，Dicky大爆90年代在清水灣電視城「大鬧」古裝街一事，Edmond聞言緊張問道：「呢單嘢講唔講得㗎？」Dicky說：「講得，佢哋啲高層都知，你唔知我俾高層捉咗入去咩？我哋夜晚去古裝街玩，十個人分成兩邊，匿埋再追射……」安仔補充說：「周潤發、趙雅芝拍《上海灘》，周潤發衝入教堂嗰個位。（阿公大叫：程程！）就係撞爛晒嗰度啲玻璃。」Dicky又描述當時的情況：「有人當咗自己係隊長，揸住支槍去到玻璃嗰度『轟』一聲，真係亨爆咗塊玻璃，再隊支槍出去話『一齊嚟！』我唔敢，呢個人係四個當中其中一個。隔咗兩日，有人話珍姐（曾勵珍）想見你，珍姐話『你哋玩到冇嘢好玩？係咪好掛住返嚟古裝街開工？有冇搞錯，教堂塊玻璃俾你哋打爛，要你賠添呀，呢度唔係俾你玩。』我話知道。」安仔笑說：「成條古裝街地下都係BB彈。」Dicky再分享：「我哋試過『走鬼』，因為有保安聽到聲。」Edmond說：「佢揸架保安車入嚟，開個大燈照住我哋話『你哋好出嚟啦喂』，跟住張衞健匿埋喺車底，太多好笑嘢。」
安仔謝絕影貼紙相
相識多年，問他們最不想BIG FOUR做甚麼活動時，安仔直言謝絕與三位兄弟一齊影貼紙相：「有啲尷尬，四個男人走入去個框框影相。」阿公卻指BIG FOUR曾於日本影貼紙相：「90年代有次我哋四個去日本，嗰時有啲影相機，我哋四個逼入去影過一次，但張相就冇咗啦！」
