一名中五女學生早前在銅鑼灣一試身室，試穿比堅尼泳衣期間出現驚險一幕，差點被一對正在尋找失物的中年男女擅自拉開布簾看光光。女生驚到震大嗌：有人，並用盡最大勇氣講出5個字「退敵」。
女生事後自責「覺得自己好無用」，不少網民對此感到心痛，大力安慰這任入世未深的小妹妹；另有人慷慨分享自己過去「被開簾」的不快經歷。詳情見下圖及下文：
銅鑼灣試身室換比堅尼 中年男女圖擅開布簾尋失物 中五女生驚到震大嗌逐張睇↓↓↓↓
樓主：好嬲，好驚，好無助
樓主本月12日在社交平台Threads發長文猛呻「好嬲，好驚，好無助」：
在店鋪試衫，「試到一半嗰陣聽到出面有個女人喺出面講嘢，話自己留咗件衫喺試身室入面。我一開始不以為然，我入去試身室嗰陣入面係空嘅，根本唔關我事。我聽到個女人同佢男友人傾偈，個女人話試身室入面有衫，個男人就話可能有人。
試到一半嗰陣個女人突然好似係對住我嗰格問有冇人，我以為佢係同其他人講，冇即刻應佢。隔咗兩三秒後佢個朋友話好似冇就開始撕開更衣室最出面嗰層布，我聽到撕個吓，即刻大叫有人。我嗰陣時試緊Bikini，我好驚，唔想俾人見到。我把聲震住，叫咗第二次佢先聽到有人，個男人先至冇再撕，個女人話：『哦，原來有人 。』
因為仲有其他衫，所以我繼續試。一路試嗰陣聽到個女人同個男人喺出面不斷好大聲傾偈。就嚟試完嗰陣個女人好唔耐煩咁敲咗我更衣室外面嘅木框，『小姐，請問你得未？』。我個吓真係好嬲 ，我大嗌：『我仲試緊，你可唔可以等陣？！』，佢話：『吓，不過我好似漏咗嘢喺入面喎。』我大嗌：『我入去嗰陣時試身室係空㗎，乜嘢都冇㗎！』，佢先至話：『吓咁呀，可能我留咗件衫喺第二度』」。
我出到嚟嗰陣見到佢同佢朋友，佢哋一句唔好意思，sorry（對不起）都冇。企喺佢哋附近有個職員，個女人不斷重複自己唔見咗件衫，個職員就話：『哦咁我幫你喺其他試身室搵吓啦。』我有諗過要唔要大大聲鬧佢哋，做咩冇啦啦搣更衣室嗰塊布。但係我好驚、好嬲，我只不過係一個中五女仔，人哋係40歲嘅女人同男人，個吓喺更衣室入面大嗌『入面咩都冇』嗰陣，我已經盡咗最大勇氣。我覺得自己好無用」。
網民安慰鼓勵：已好叻女
•下次你嗌咗話有人先，就算唔係問你，咁佢都會聽到就應該唔會再夾硬嚟，正常情況下。
•唔緊要，你都係輸經驗。記得下次萬一再發生呢啲咁慘嘅事要出聲，呢件事無論係嗰對男女定係個職員都錯晒。
•你驚好正常，你識得上嚟分享已經好叻女，但你記住，一路成熟，你都要學識保護自己，將來亦要好好保護其他人啊！
•既然落咗簾，即是有人係裏面，點可以私自拉開人哋塊簾，職員又唔理，太離譜喎！所以我唔鍾意用拉簾嗰啲試身室。
•妹妹，明白你當時嘅感受，一定好驚，抱抱，但你要長大，學識保護自己，你自己唔勇敢出聲，周邊的人想幫你都無從入手，加油。
•其實嗰兩個人根本唔應該自己咁樣撕開塊布～正常唔係應該同個staff（職員）講，然後個staff幫佢地check（檢查）嘅咩？應該投訴嗰個staff～
•唔好怪責自己，根本係嗰兩個人同埋職員問題，你當時反應到嗌住佢哋已經好叻。係嗰兩個人冇禮貌，職員都唔應該俾其他人入到嚟fitting（試身室），仲要由佢哋整塊簾。
•睇文字都感覺到你好難受，心痛你。正常操作，就算唔見嘢都唔係自己入去搵，應該通知職員，由職員陪同下一齊搵，或者由職員主導去搵，點都唔係個客自己落手撕開人哋個簾，仲要係男人去女裝試身室個簾。
•係嘅，你真係好冇用，不過你只係得中五，仲係入世未深嘅少女，而家唔識應付呢啲問題唔緊要嘅，下次你可以大大聲鬧出面嘅人，話你換緊衫，你再摵開我試身室嘅布簾，我會當你想非禮我，我會報警。著返衫之後就出去搵職員，問吓佢哋點解可以俾人隨便入試身室開人哋布簾，甚至乎如果你真係感覺成件事令你好唔舒服，你係可以問佢哋拎公關電話作正式投訴。對方係幾歲都冇問題㗎，道理喺你度就需要據理力爭，加油！
網民分享「被開簾」苦事
在回應欄內，也有不少網民也慷慨分享自己的「被開簾」苦事：
•以前試過係試衫俾個職員無啦啦開門衝咗入嚟，嗰時仲要試緊bra（胸圍），細個唔識爭取權益，好後悔。
•在日本試衫時，個男職員拉開個簾，好彩我嗰陣時已經試完著鞋，著完鞋之後我就衝出去用畢生嘅英文鬧爆佢！
•試過喺醫院比隔離床探病成棚中年人拉開我簾，好在我有著衫，仲要話原來有人，一句sorry都無。好多呢啲中年人根本就好無教養，我完全明。
•在太古城之前都試過，又係試試吓俾人拉開咗張簾。我同個員工投訴，佢話經理會打返俾我，之後冇人打過俾我，send email（傳電郵）都冇人覆過。
•好耐以前試過，換緊衫突然俾嗰阿嬸拉開布，出面好似仲有其他人，嗰阿嬸望咗兩眼就斯斯然走咗去，sorry都冇聲又冇拉返埋塊布，嗰時我嚇到唔識反應，自己拉返塊布換返衫。
•在旺角試泳衣，有個男人無啦啦一嘢拉開塊布。我完全反應唔切，嬲到淨係識得講好大聲話：咩料有人啊！！！！一著返衫出嚟就搵唔到佢報仇…（嚴重懷疑係慣犯）之後每次去冇得lock（鎖）門嘅地方試衫都勁有陰影。
樓主感謝網民支持
事隔兩天後，事主本月14日再留言感謝網民的支持及鼓勵，指「感謝大家嘅支持以及鼓勵。我本來post（發帖）Thread 係希望大家可以對呢啲情況有所警惕，以及促進涉事公司嘅跟進及改善行動，避免再有受害者發生」，她並表示，已電郵到涉事公司反映情況。
資料來源：cute.cat_1234＠Threads
