MIRROR成員盧瀚霆（Anson Lo）入行7年經歷了大大小小的難關，抗壓能力成功提升，生活工作上都取得平衡，下月迎來30歲生日，Lo要做一個有承擔的男人，擔起養家的責任，令父母的退休生活更精彩。撰文︰陳凱詩 攝影︰林賓尼
Lo推出今年第二首派台歌《你都有今日》，今次製作班底非常特別，邀得Howie@Dear Jane作曲、黃偉文（Wyman）填詞，Dear Jane聯同阿琛共同監製，度身訂造首支Rock Ballad歌曲，MV在YouTube上架短短4日已衝破100萬點擊，相當厲害！歌名好像帶點寸嘴，像是在諷刺別人，Lo表示第一眼見到歌名都有點驚訝，但在Wyman解釋這首歌的概念，自己再細心了解後，發現其實是一首鼓舞人心的歌，意味着「每個人都有今日」，至少依然活着，可以活出自己，不要再糾纏在過往的失敗，好好把握今天move on向前行。笑問現實生活中有否向別人説過「你都有今日」，Lo笑言：「由細到大都冇講過，玩就會咁講，但真係好少聽到寸人會用呢一句。」
獲Dear Jane力挺 So Sweet！
今次破格邀得Dear Jane做監製，第一天錄音更獲全員上陣陪伴，Lo高呼：「好crazy，我本身知道阿Tim會嚟，點知Dear Jane全員都嚟，阿Tim話佢哋都好想嚟支持我，我覺得好sweet。嗰日我錄咗4個鐘，全部人都keep住坐喺度無走到，仲好留心聽同畀意見，即刻諗到啲arrangement係點樣做，好似一班大哥哥喺度backup住我，真係好感謝大家。」Lo與Dear Jane就好像屋企人，經常會在不同場合碰頭，亦曾經合唱過歌曲《MONEY》，每次見面都會互相慰問，最常問的是︰「你近排點呀？大唔大壓力？」這種感覺很親切。
新歌提到昨天失去才有今天，Lo坦言入行這7年經歷了大大小小的難關，特別是即將踏入30歲，自覺比以前長大了不少︰「無論樣貌或者思想上都成熟咗好多，有好多嘢都放鬆咗好多，冇以前咁驚咁執着，依家過每一日都係向前看。」談到這7年來最大的難關，Lo：「入行第一個好具體嘅難關，係我隻狗（Roxy）過咗身，雖然唔係第一次接受生離死別，但係我至親嘅一個經歷，當時係好難過嘅一關。」幸好當然有MIRROR兄弟和神徒們的陪伴。
學識自製Me Time
Lo指現時自己處理壓力的能力提升了︰「過去一年相對係小喊咗好多，唔會一嘢就喊，會慢慢process，我覺得同自己work life balance好有關係。依家會2、3日跑一次，將跑步培養變成一個習慣，又採取咗張繼聰前輩的提議去沙灘grounding（吸地氣）。 」
雖然工作排到密密麻麻，但現時他已懂得為自己製造me time，並笑言：「呢個me time其實唔係好健康，可能收咗工之後返屋企，就犧牲瞓覺時間，畀自己睇吓戲，但係呢啲me time係好緊要，所以我覺得冇對與錯，每個人搵me time嘅方法唔同。」出名是孝順仔Lo，原本計劃了今年4月同家人去旅行，但因教父教母已經約了朋友外遊而未能成行，惟有再努力夾檔期。
睇《妙手仁心II》立志行醫
而在新歌MV大玩「制服誘惑」的Lo穿上護士裝，神徒都將焦點放在他的爆肌身形上，Lo澄清：「其實件衫唔係好啱我size，但搵唔到再大件啲，就變咗好逼，你哋睇落就覺得我好大隻，但其實我係冇咁大隻㗎！」他續指依家亦有不停操肌，cardio加重訓雙管齊下。
Lo透露小時候因睇劇集《妙手仁心II》曾立志做醫生，並大爆Anson的英文名的由來：「啱啱小一嘅時候睇電視劇個醫生角色係叫Anson，嗰陣覺得佢好有型，所以就改自己個名做Anson，亦因為咁，細個覺得長大後一定要做醫生，但到中學時發現理科唔係自己叻嘅嘢，自己亦興趣不大，所以就冇做到。」
公開素顏無壓力
2025巳過了一半，下半年Lo正拍攝以全英語對白演出的劇集《The Season》 ，同時電影亦在籌備當中，還要開會、排舞、宣傳新歌，以及錄製開騷前會推出的album，所有範疇一同進行，非常忙碌。問12月的個人演唱會，Lo就劇透是在12月初：「睇完應該未過聖誕。」
在團綜《呂濤米Lo 花Son Show》中，Lo激罕在鏡頭前即場卸妝，公開真實素顏，他表示：「感覺都冇乜嘢，最驚訝係落個下，全場工作人員都『嘩』，因為我抹完仲白過個妝，大家就覺得好誇張。」他續分享心聲：「有工作人員話其實冇需要咁樣落妝畀人睇，做乜要proof畀人睇？如果佢係唔鍾意你，你做呢個行為，佢都係有100個方法唔鍾意你，但係對於呢一個落妝行為我係舒服嘅，同埋我都想畀大家睇吓我另一面，當係畀大家睇下未見過嘅Anson Lo，同做戲角色一樣，總之我唔介意就OK。」
30後想試形象大改造
7月7日迎來30歲生日，Lo早在28歲開始經常被提醒自己即將30歲，感覺30歲是一件很恐怖的事，青春快將要完結；但到現在感覺反而覺得成熟了，可以做一個真男人，有承擔說到做到，Lo說三十而立就像跨去人生另一個轉捩點，人生目標更加明確︰「想繼續去養起屋企，想父母生活越嚟越豐富精彩，佢哋而家退休嘅生活都精彩忙過我，周圍去玩、探吓親戚朋友 ，呢個係我好想見到嘅畫面，我都好想繼續提供呢啲生活比佢哋。」而30歲的目標：「我冇一個目標係30歲之前要完成一樣嘢，但我想睇踏入30歲之後，演一啲好唔Anson Lo嘅角色，可以畀我一個形象大改造，如留長頭髮、生到滿面鬍鬚，總之係完全唔同形象！」神徒們拭目以待！
化妝：Rainbow Chung @Annie G. Chan Makeup Centre
髮型：Denny Ku @Chic private I salon
服裝：Dmop, iiJin
造型設計：PIPA Creative
地點：Lubuds Group, FWD House 1881
