MIRROR成員盧瀚霆（Anson Lo）今日（2日）為商台節目《叱咤樂壇》任嘉賓，場外吸引逾百名粉絲等候偶像，由於天氣炎熱，不少粉絲撐傘。身穿藍色外套便服Look的AL，於下午12時乘坐七人車到達。出名愛錫「神徒（粉絲名稱）」的他，下車後沿途跟場外的粉絲揮手示好，又企定定讓記者拍照。談到天氣炎熱，可會擔心場外的粉絲中暑，AL坦言天氣熱，需要多飲水，又即刻做出飲水手勢，提醒粉絲要多飲水。
Anson Lo三十而立有抱負
首支Band Sound歌曲《你都有今日》，製作班底找來Howie@Dear Jane作曲、黃偉文（Wyman）填詞，Dear Jane聯同阿琛共同監製。AL表示首次與Dear Jane接觸是2023年推出合作編製的Rock版《Money》，他坦言：「我本身就係好鍾意Dear Jane，亦都對Band Sound好有興趣，所以就想借佢哋嘅試吓Band sound 。上次《Money》真係玩得好開心，好似Band Sound嘅靈魂出咗嚟，好正！直到2025年計劃時，決定要有一首Band歌，就即刻諗起Dear Jane。」AL更表示錄音時，Dear Jane全員出席陪伴，4小時完全沒冇離開過，每個人都有給予意見，好sweet。
今次新歌找來Wyman填詞，他坦言一年一度的慢歌都會希望由Wyman操刀，加上即將踏入30歲，所以希望寫一首與人生或者時間有關的歌曲；被問到對於30歲有甚麼睇法？AL笑言由28歲開始經常被提醒即將30歲，感覺30歲是一件很恐怖的事，青春即將完結；但到現在反而覺得可以做一個真男人：「三十而立，可以係一個Turning point，23歲出道到而家，大多數時間都青靚白淨，斯斯文文。30歲自己個樣大咗，成熟啲，可以接演多啲唔同嘅角色，可以冇咁定型，譬如髮型，而家多數都係心形頭，或者可以試吓攣頭髮，污糟邋遢嘅形象。」
AL續指30歲是一個契機，可以慢慢試一下，至於他所指的真男人：「唔係睇外表黑黑實實大隻個啲，其實係對自己講同做嘅嘢有冇承擔。用自己談吐及作品去present自己嘅belief出嚟，要說到做到嘅人先係真男人。」
Anson Lo轉牛角尖
AL表示收到新歌歌名《你都有今日》時嚇了一跳，感覺好寸好輕佻，仔細睇之後就會明白，他續指新歌概括了人生中你會遇到的難題，任何階段聽這一首歌，總有一句會是你的感受，而最打動他的一句就是「天天 滿血 復原 明明還 未到限期 別掛白旗」，並表示：「這一句是這兩年經常經歷到的，昨日好唔開心，但係瞓醒覺起身，新的一天就復原。」
被問到人生有冇試過甚麼想放棄？AL感觸表示：「其實自己試過好多次想放棄，例如MIRROR 演唱會之後，我無數次想放棄，尤其是兩年前自己情緒都比較唔係好穩定，又或者有好多時面對fans嘅爭執，我都會想放棄，因為我覺得我嘅存在令到人哋唔開心，如果我消失於娛樂圈，大家咪少啲紛爭，有時會轉牛角尖。」續指每一次望住神徒做的一切，就會撐起來。
今次《你都有今日》MV，AL化身護士角色，他坦言小一時看過一套劇集 ，覺得那位醫生Anson好有型，所以自小想做醫生，亦因此改了名做Anson，不過後來自己對Chemistry不感興趣。至於MV中AL流眼淚，他表示事前與導演夾過不用喊，最後隨住劇情發展，自己對角色的代入，亦不禁流淚。
Anson Lo個唱12月頭舉行
訪問到尾聲，向來是劇透的AL當然有向神徒派福利，除預告下一首歌「玩味得意啲」，也透露在大碟收錄了一首送給神徒的歌曲，而大碟將於個人演唱會前推出，他表示個人演唱會將於聖誕節前，12月頭舉行，令一眾神徒都非常期待。最後，他表示正忙於拍攝劇集《The Season》 ，大讚製作形式與香港好唔同，鏡頭角度亦都好特別，是一次很好的體驗。
雖然AL忙於為節目錄音，趁有空更專誠跟場外神徒見面。下午2時30分，AL從停車場步出，沿途不停跟神徒打招呼，更不忘提醒他們記得多飲水，並說：「要飲水呀！唔好中暑，我要多一陣再出嚟。」拍照期間，大批神徒大叫新歌名《你都有今日》，AL 即舉手指公讚好，又擺出心心手勢，其後便返回大樓繼續錄音工作。
Anson Lo為苦等神徒簽名
Anson Lo完成工作後，與跟門外的「神徒」互動。晚上6時40分，他在停車場出現，更有求必應為欄杆外的「神徒」簽名，亦有不少「神徒」送上禮物給偶像，還不時齊聲大嗌「盧瀚霆，我愛你！」雖然天氣炎熱，Anson Lo熱到流晒汗，仍堅持為「神徒」簽名，認真「寵粉」。1小時後，Anson Lo準備離開前，再次沿途跟「神徒」講Bye Bye，隨後登上七人車離開。
