有網民昨日（3日）在旺角街頭遇到兩名途人，其中一人戴口罩「扮識」，事主一時無法分辨，和這名「熟人」寒喧起來，期間竟獲發獎券並成功刮中大獎，之後被帶往領獎，途中對方多次更改目的地，事主驚覺有異中途急急走人。
由於事件動機未明，惹起不少揣測，部分網民懷疑事件可能涉及迷暈黨，指與過往一些迷暈黨犯案手法相似，事主亦坦言，中途有擔心會被迷暈行劫，但有部分網民懷疑有關人士另有所圖，詳情如下：
旺角迷暈黨疑雲以中獎獎券為餌？事主街頭遇「熟人」寒喧遇險 網民疑另有企圖↓↓↓↓
男事主昨日（3日）在社交平台Threads發帖表示，剛才傍晚時分在旺角西洋菜南街兆萬中心出面，遇到兩個人，年齡「20尾到30頭」。他指，其中一個講流利廣東話、戴住口罩的人士截停他，「扮識我，先講好耐冇見，問我做緊乜，再問咁耐都冇轉工咩，同嗰度好做咩。」
事主表示，「因為佢帶住口罩，我認唔到佢係邊個，所以禮貌性做咗啲簡單嘅回覆」，之後這名口罩「熟人」身邊的另一人，主動與事主認識，「嗰個人就主動講佢自己叫咩名，同問我叫咩名，然後就攞咗張抽獎卡出嚟叫我刮。」他指該人廣東話「有少少口音」。
動機未明 事主提醒小心：無啦啦攞張抽獎卡出嚟係極度可疑
事主於是即場刮抽獎卡，「刮一刮就見到價值888$獎品，跟住佢哋就話要帶我去攞獎品。」事主跟隨去取獎品，「初時我哋沿著西洋菜南街向北行」，途中事主問兩人「係咩獎品，佢無清楚咁講，淨係話到時我可以自己揀，又話之前有人抽中三百幾蚊攞走咗部電視」。
事主再問取獎品的目的地，但對方口頭不斷更改地點，「佢先講西洋菜南街同豉油街交界嘅手機舖，去到嗰個位置右轉入豉油街再講林香檸（手打檸檬茶店）。」最後，對方又說「最終位置係旺角豉油街……巷仔其中一座建築物」上面的一間健身中心，男事主表示，他最後去到手打檸檬茶店門口，即話「唔想去然後走咗」。
兩人動機未明，事主對事件感到非常奇怪，他指事件有兩處可疑之處，一是扮熟寒暄：「正常街上撞到寒暄幾句，唔係好熟冇乜話題，就應該分開，嗰個位拖一拖已經有啲奇怪。」二是抽獎及領獎：「無啦啦攞張抽獎卡出嚟係極度可疑。之後問中咗咩唔講，問去邊又唔講，嗰陣時已經知道係唔對路，仲要上樓就真係絕對冇可能再繼續。」
他發帖提醒網民小心：「事實上無啦啦有888蚊根本就係好有問題，旺角街頭充滿危險大家都小心啲。」
網民籲提高警覺：會唔會中途整暈你？有人疑是……
有網民留言指事主警剔心低：「真佩服你，三唔識七，可以傾咁耐，仲要跟人走，你真係要食多D提子（指警方防騙吉祥物「提子」）。」事主則解釋：「中途未firm係咪真係唔識嘅，同埋都想知道發生緊乜嘢事，就係睇得提子多所以提高咗警覺。」
部分網民懷疑事件涉及迷暈黨：「好有可能係迷暈黨，有無諗過去啲僻處迷暈你？」「……會唔會中途整暈你，因為之前有人分享過，畀人噴煙，冇耐就開始暈，然後畀人夾走，或搶嘢，好在你冇跟住上去，真危險。」事主亦坦言：「中途都有諗過。不過話曬都旺角西洋菜南街，香港應該未危險到呢個地步。」
由於最後目的地為一間健身中心，部分網民則懷疑事件涉及健身中心推銷，「呢D呃人方法成廿年啦，旺角同九龍灣淘大都遇過，最近行銅鑼灣SOGO附近，都有條友突然話係我同學，但我未見過佢，估計都係呢D呃簽健身約嘅垃圾。」有網民又指去年底結業的一間大型連鎖健身中心「好鍾意用呢招」。
來源：frwhale＠Threads
同場加映：港女皇崗口岸疑遇迷暈黨 三度碰面企到好埋 一除口罩由頭暈到尾↓↓↓↓
