(曾智華)
美國總統特朗普上任後，日日見記者，日日有 講，可以語言粗鄙（Kiss my …），可以前言不對後語，可以今日的我打倒昨日的我，可以大言不慚，可以唱衰國內國外對頭人，可以面皮成丈厚狂讚自己而踩人 乜都錯。最新又最惡頂 上任一百天民意支持跌破歷任總統紀錄，竟可仍扮陳百祥唱——「Yeah我至叻，我 餐餐都做阿Head」！相信在狂特第二次上任前，全世界冇人估到佢的「表演」，可以厚顏到咁盡，嚴重違反美國傳統價值與品味。
好了，當你以為特朗普犀利，哈，原來有人更犀利，小弟強烈推薦大家「欣賞」！
一直以來白宮發言人都由萊維特（Karoline Leavitt）負責，朝朝面對記者，為老闆補鑊。但狂特的招數又多又亂，錯漏百出，而美國記者著名尖銳，每朝的「早禱會」，必定連珠炮發，答到萊維特一口泡，口窒窒。
相信特朗普睇見，都皺晒眉頭，唔會滿意，但換人未係時候。
終於在第一百天後民意插水，頂唔順，立即任命一位「光頭仔」 白宮副幕僚長史提芬米勒（Stephen Miller）出陣，此君據聞將升任國家安全顧問。
呢丁友認真犀利，比特朗普更厲害。第一次亮相「早禱會」，已技驚四座。當萊維特讀完一輪台詞（全部擦鞋、賣膏藥）之後，就將舞台交畀光頭仔，佢一張貓紙都冇，揚言歡迎在場過百記者問問題。
此君眼神少少呆滯，但反應快如閃電，你問佢國防、外交、經濟、教育、移民 政策，雖擺明詭辯，但答到頭頭是道，全場記者吹佢唔脹。若論打「傳媒爛仔交」，可能是當今世上第一專家，勁過佢老闆！
