曾智華
正是天要下雨娘要嫁，有些大趨勢，絕不因個人意志而轉移，例如賽馬投注額下跌。
賽馬吸引力下降理由簡單，包括：一、此乃長者活動，年輕人接力甚少；二、欠缺明星馬及明星騎師，尤其後者一家獨大，冇晒競爭性；三、智能手機出現後，海量有趣的新鮮事物不停出現，吸引力非比尋常；四、潮流興北上及「返屋企」，故一放長假即幾十萬至上百萬人湧出香港，只要當中十分一為馬迷，已「損失」慘重。
上周日正是如此，投注額比上年同期顯著急跌。其實賽馬投注額下滑，已年年出現，上季就跌 9.3%。幸而足球博彩及六合彩投注頂住，否則更大大鑊。所以，政府急急「走程序」通過籃球博彩，正是清楚看見博彩稅收源頭正在萎縮，必須擴闊。
其實就小弟睇，香港賽馬活動吸引力下降，原因之一為馬會太強勢，搞到直接間接控制大部分（全部？）傳媒賽馬報道及分析，包括網上及文字，於是賽馬節目及專欄皆欠缺百花齊放的活力及創造力。個個驚講錯 之下，紛紛四平八穩，尤其官台，更毫無娛樂性，怎吸引新馬迷？
我並非話要出現多個「董驃」，但事實，若果多一批有料、敢言或充滿娛樂性的馬評人出現，咁就可慢慢增加賽馬以外的「表演」，令觀眾人數上升。當然，更重要是快度點樣引北人及北水入馬場。馬會唔好自己諗啦，因必僵化，外判啦。
明晚快活谷二千二百米大長途，我最喜歡「客家之光」，最近兩次同程入Q及P，分數冇加，一於做膽，拖「八駿笑昇」、「捷足奔馳」及「幸運同行」，二重彩複式「藕」六十蚊落去。
中就中，唔中食白飯加兩 。
