有港媽早前在facebook群組「聘請工人姐姐關注組」，上載年幼女兒在外傭房間被打瀉熱水壼嚴重燙傷手部的又紅又腫相片，引起網民嘩然。
港媽並寫下千字長文，呻爆涉事外傭的離譜工作態度，除意外燙傷B女的手部外，還有其他打爛嘢、整爛嘢、洗嘢唔乾淨等問題，甚至經常要求外出散心，夜晚要出街散步跑步，晚上「8點雞咁腳就出去到11點先返」。詳情見下圖及下文：
外傭意外燙傷B女隻手又紅又腫逐張睇↓↓↓↓
樓主千字長文：「警世post（帖文）（有嚴重燙傷照片）
上年（2024年）8月請咗個新嚟港菲律賓姐姐，開頭interview（面試）講明樓層多同大地方（有1個6個月B同3歲小朋友），因為住村房分A同B住，同屋企人住隔離，但係有share job（共同工作）姐姐一齊做嘢。開頭兩個月我未返工，一切嘅嘢都如常進行。10月見佢ok就返咗half day job（半日工作）。
（外傭姐姐）到11月話老豆過身要返去，好啦照俾佢返去，佢最後都有返嚟。一路都心情唔好，成日都話要休息下，落街行下。到12月就燙傷我個女隻手，話我BB爬入佢間房整瀉個熱水壺，我之前都話過小朋友唔可以入工人房因為冇裝cam（攝影機）。咁整親之後就喊晒話唔小心，醫生話問過佢事發經過都係合理嘅意外發生經過，只能夠話係安全意識低，告唔到。整親完我女之後又話好自責，好多人知道佢整親我BB喺佢背後話佢，好大壓力，成日話要散心呀。又話唔忍心見到我個女喊要出去散心。我個女個傷口成兩三個月先係完全好返，中間有次叫佢同我女複診，我個女喺入邊喊緊佢仲喺出邊打手機。
咁自從阿女整親之後就同我另一位姐姐調轉工作唔俾佢掂BB，跟住啲清潔就開始出事，整壞整爛啲吸麈機呀，唔講，到我用嘅時候就I don’t know mum（女主人，我唔知道）。都算，啲嘢洗得永遠唔乾淨，扭乾嘅永遠都係濕滴晒水，鑊鑊都要幫佢執手尾。到12月尾倒數，已經話咗我同先生有活動要出去晏少少返 （啲小朋友我哋自己氹瞓教攪掂晒先出去），佢由晏晝開始問可唔可以出去同朋友到數。我話唔得我哋都要出去，邊個睇住小朋友（拒絕佢），佢都繼續問問咗3、4次，到最後我話我哋出去一陣，10:30返嚟到佢出去倒數完佢就返嚟。因為第二日係佢假期，佢夠膽死倒數完第二朝清晨5點先返尼屋企，我就出咗warning（警告）話唔可以再發生呢啲嘢。
之後一路都係做嘢麻麻 ，完全唔識分配時間，錯嘅時間做錯嘅嘢，每日做趕頭趕命打爛嘢整爛嘢，成日同另一個share job姐姐比較，當住啲小朋友面鬧交發癲。近呢個月成日話夜晚要出去散步跑步，咁夜晚通常都係自己照顧小朋友，俾佢去咗一兩日到之後直接知會你一聲，8點就雞咁腳就出去到11點先返。最離譜又係又凌晨2點先返呢，11點叫佢即返嚟都唔聽。成日口脗就係叫我即炒佢，如果唔鍾意佢嘅話。擺明係博炒。
而家新工人就嚟到港，準備即炒佢，想問吓應該補幾多日年假？同埋佢應該會搵下個僱主，大家如果想知道佢啲資料就PM（私訊）我」 。
相關閱讀：B仔嘴唇流血紅腫 港媽CCTV驚揭外傭湊B「咁離譜」 出Po求助：有冇得告虐兒？
樓主補充B女最新康復情況
樓主補充B女最新康復情況——「而家其實大致好返晒，不過都仲有啲疤痕，色都好淡，唔仔細睇，其實都唔太發覺。不過我小朋友整親之後差唔多4個月冇重過，完全冇胃口食嘢」。
相關閱讀：神秘「21字信」寄外傭港媽求救 知情者揭驚人真相 驚告：千祈唔好俾姐姐！
外傭意外燙傷B女隻手又紅又腫逐張睇↓↓↓↓
網民心痛B女：BB好痛
回應的網民相當同情B女，指「BB好痛」、「睇到都心痛」、「睇到小朋友隻手咁樣真係好慘」。另有人關注事件應如何處理，「好心痛同時好憤怒，點解可以忍咁耐又唔報警？！」、「應該一早炒」、「一定要報警！唔好心」、「其實個女傷咗嗰日就要炒佢啦！」、「就算唔報警,整到小朋友咁傷都即炒」、「呢個可以當係嚴重錯失 即炒唔使賠錢」、「嘩，整到小朋友不能接受。如果工作時間都話要出去，咁點得」。
樓主回覆其中一個留言時表示：「因為我哋都問過醫生，佢都話就算報警未必告得入，都係可能口頭警告下」。
另有人提醒「你小心話炒佢之後會有咩極端行為，記得帶走小朋友先」，並指「好恐怖，見到都心痛，哩啲人真係好狠心，遲啲你炒咗佢，一定要擺佢出嚟，唔好害咗下一個」。
資料來源：Venus Chung＠facebook
相關閱讀：港爸指控外傭疑報復煲粥嚴重灼傷BB 手及半身不停甩皮：醫生話可能要植皮 警拘43歲菲傭涉虐兒↓↓↓↓
有港爸早前在網上發帖指控外傭疑報復，在被指責偷懶後，即抱剛一歲大的BB入廚房「睇粥」，未幾傳來BB瘋狂大喊，BB手及半身不停甩皮，被醫生診斷嚴重灼傷，有可能要植皮。
消息指，警方2025年3月5日接獲報案後，經調查後同日在馬鞍山以涉嫌虐兒拘捕一名43歲菲傭，現正被扣留調查，案件交由沙田警區刑事調查隊第六隊繼續跟進，至於男童經治理後已經出院。
事主3月4日晚在網上發帖求助，查詢解僱這位外傭的程序，但網民紛紛促請事主「報警，即刻報警」，交由警方調查事件。以下港爸自述事發經過↓↓↓↓
