堅決只派實體利是

每年此時,老婆大人都會落Order,指令為夫到銀行排隊換新鈔。一個老婆咁做,一萬個、十萬個老婆都咁做,銀行怎不打晒「老公蛇餅」?

  但又無法喎,因銀行只此段時間推出新鈔。點解唔用舊鈔?封利是用舊鈔,封者與收者都冇癮,故此一年煩一次都冇計——排就排。

  本來若你熟悉銀行經理,通常可以預留,有關係就掂。但我冇用呢種方法,寧願排隊,點解?簡單,人 為乜無情情畀個特權你?當人人要排隊,但就刻意替你先留起新鈔?

  經濟學101,呢個世界絕對冇免費午餐,當你食完銀行經理額外人情後,好唔好意思他日佢有求(有Sell)於你時,閣下一口拒絕?怕且好好醜醜都要應酬 啦。

  行行生意都難做,銀行當然如是,職員由下級至上級,都要諗計搵錢,其中一種就是向客人推銷花款多多的金融產品。

  小弟一再指出,任何金融產品的設計,絕非為消費者牟利而設計,相反,是為謀客人的錢而設計。銀行一賣出產品,就賺佣、賺差額兼賺行政費。事實上,金融產品多純屬大型國際金融集團外判畀銀行分銷,銀行只賣完收佣,基本冇風險,當然向客戶大推特推。

  講到呢度,你就知點解我寧願排隊換新鈔,都唔領客戶主任人情 。

  有人又話,排乜鬼隊 ,如今乜都講科技,撳個掣就可以封利是,方便又環保。

  No,No,No!小弟決不會派虛擬利是。

  利是,乃一種人與人之間的親手感情交流媒介,一派一收之間有著送暖的含意。派時,我一定由衷地加句:「祝你身體健康!」然後,兩眼對望,一種人與人之間的暖流,就此互傳。

  故此,今天或以後,堅決只派實體利是!

Uncategorized