馬會剛公布最新一批退役馬匹的名單，其中一匹是「交學費」。
這匹馬令我有深刻印象，因為馬名相當「唔老黎」，養隻馬來交學費，不求名利雙收，結果馬如其名，一直是三零部隊，從未入過三甲，場場比賽都真的是交學費，有出冇入，得到的獎金是零，真係得啖笑。
賭馬畢竟是偏門玩意，改馬名點都討個好意頭，例如「天天更好」、「時時歡欣」、「贏完又贏」、「富喜來」、「增旺」、「一生好彩」等等，無論隻馬跑成點，淨係大嗌個馬名，已經充滿正能量。
改名也可以投放個人感情，用馬名去向馬迷傳遞善知識，例如「知恩圖報」、「常常感恩」、「同益善」、「知足常樂」、「大愛無疆」等等，賭馬都可以參透人生哲理，這些馬主的修養，果然有深度。
「交學費」的馬主則夠晒謙虛，猶如初到貴境的新手馬主，抱著交學費好好學習的精神，抱拳向各位前輩大哥問好，「我隻馬加入馬壇是來交學費的，請多多指教。」可惜每次比賽都樣樣不合格，學費是交了，卻交不出成績，最後唯有被「踢出校」，冇得再繼續「讀」落去了。
不知道跟「交學費」競逐的馬匹們，會不會出現欺凌，訕笑揶揄：「兄弟們，佢叫『交學費』喎，既然交咗學費，就等佢學吓咩叫做跑馬囉，一陣間贏佢十個馬位好啦，唔好贏太盡，費事細路仔輸完要搵媽咪喊呀，哈哈哈！」
既然馬主咁玩得，又不忌諱「唔怕生壞命，最怕改壞名」，下一隻會不會改名「鋪草皮」或者「補習老師」呢？