曾智華
大家小學必定讀過——由儉入奢易，由奢入儉難。但究竟有幾多人真真正正有切身體驗呢？
大部分上世紀五十、六十、七十年代出生的香港人，食到應經濟起飛，香港隨著內地開放大大得益，所以皆能享受由儉入奢。
小弟一代，童年時十之九九住《七十二家房客》式舊樓，七十、八十人逼埋一齊，用一個廚房、一個廁所（馬桶），奇在從冇打交鬧交，反之，互相忍讓，守望相助。
小時，冇床瞓，瞓地下；冇風扇，手撥扇（根本唔知有冷氣機）；衛生差，個個生「大孖瘡」；窮到燶，父母早畀心理準備，小學後可能要出嚟捱，中學讀到中三，若成績差就出社會工作，入大學肯定絕望。有冇叫過一句苦？冇！半句都冇！因全部預咗，個個都係咁㗎啦。
不過，隨著你捱我又捱，加上香港食正內地及日本、歐美等經濟起飛，單單賣自由貿易及做內地與外國中介人，已重重過水濕腳，大賺特賺。
七十、八十年代最神奇，生活質素火速改善，由冇房變有房，冇樓變有樓，家家戶戶開始有電視機及冷氣機。做生意的豬籠入水，不少晚晚做「夜王」，八十、九十年代香港正式由儉入奢。
二千年後開始弊，內地廉價貨大量供港，全方位慢慢融入中國，邊界模糊，一樣又一樣、一行又一行開始要與內地競爭。
老友，我哋乜都貴過內地超過一倍價錢，點爭？我細細個已有家訓——世事無常，馬死落地行！
大勢所趨，會發生的，一定發生。例如中港來往，必定越來越方便，咁新界樓怎會冇運行？
上面醫療、科技及各式服務，全部高速改善，又大幅平過香港。消費者有自由，怎不向北湧？趨勢如此，冇得怨，不如快啲諗吓點裝備及改善自己，適者生存呀！