(曾智華)
經過多年風雨侵蝕，小弟房間凡遇狂風暴雨，牆邊就滲水。
去年7月更大大鑊，颱風韋帕正面襲港，家中窗戶食到應，兜口兜面中招，結果，雨水由所有窗縫標入，要動用全屋舊報紙（好彩日日睇幾份）及毛巾索水。
風暴過後，窗邊牆灰剝落，地板翻起，再唔搞，今年勢必更攞命。好，重錘一次大裝修。
間房十年冇郁，堆積的紀念品、剪報、文件、DVD、擺設⋯⋯N咁多。床下底更有聖誕樹、舊書、健身設備⋯…
大裝修，首先要清場，意即開始大型斷捨離。起初逐件睇，逐件掉咗，豈料老婆大人及「排骨仔」大聲揶揄：「肥爸，今時今日仲邊有人睇DVD㗎？你都幾年冇睇啦，想睇邊套電影、劇集及音樂會，網上串流平台大把，將所有DVD及老爺放映機掉咗佢啦。」
唉，兩丁友咁講，掉就掉，狠狠將珍藏電影用冇眼睇態度，放入垃圾袋。
跟住更攞命，我1986年開始儲下每年的日記簿，至今四十年，即有四十本。內裏齊晒每日參與的活動、見邊個、同邊個晚飯，更落齊名人聯絡電話。特別1988年、1989年發生咁多大事，刺激到爆，到我直播室的嘉賓，不少已成「歷史人物」。呢四十本「嘢」，留唔留？瞌埋眼，深呼吸——掉！
老老實實，一面掉，一面覺得自己都幾狠心，又有多少痛心。痛心，尤其拋棄心愛的紀念品。我喜歡馬，故早年旅行，見馬擺設就買，成屋都係，當中最心愛的兩隻大型雕塑馬，每隻十幾磅重，三十年前由意大利佛羅倫斯Hand Carry回港，成個咕哩咁款都願，如今……又係話斷就斷！
斷捨離過程痛心、狠心，但清晒後原來好開心㗎，因乜都冇，輕鬆晒。