萬眾期待，第一百四十九屆香港打吡大賽明日沙田爆發，十四匹仍未知真正潛藏名駒，爭奪二千六百萬元總獎金。
暫時睇，冇一匹大超班馬會贏硬，因部署如此高獎金大賽，必定涉及心戰及謀略，未到終極一戰，絕不會露底。
先講過癮插曲，近年每逢國際級大戰，各練馬師皆會盤算搵過江龍客串，以增加勝算，當中莫雅、蘇銘倫及韋紀力等皆常客。
近兩年當然以全球第一高手麥道朗最搶手，在香港一級賽中，執咗千萬元計獎金。
值㗎，因有佢，騎高好多，單睇「浪漫勇士」已知，至今奪得兩億五千幾萬元獎金，冇佢，邊可能有如此輝煌成績？
好嘞，咁點解今次打吡大賽咁甩轆，冇頂級坐騎早早「嘜」定佢呢？圈中搞笑小道消息甚多，難辨真偽，只知今次咁高獎金，老麥及「軟硬鞭」（隻馬咁弱）皆冇份喇。
麥道朗唔來騎理由搞笑，為「冇機位」。多餘啦，若真係要嚟，又有機會掃百萬元策騎獎金，出埋私人飛機啦。今次真係唔知點解，兩丁大師傅都冇最高分坐騎，搞到「老麥」要扮冇機位唔嚟。難怪馬圈高人笑佢：「邊係冇機位啊，係冇機會（贏）啫！」
老「香港」有句口頭俗語——有水有水，冇水冇水！今次可以改做——有機（會）有機（位）、冇機（會）冇機（位），你話係咪呢？
至於潘頓，擺明千揀萬揀，終只得個爛燈盞，皆因貪心之過。
明日大賽，跑平磅，按道理，應最高分五隻機會最高，係咪呢？當然唔係。計分之外，仲要睇練馬師、騎師功力，以及馬匹可有二千米長力？由此角度，似乎「白鷺金剛」可秤先，要爆冷入腳，我選巴度的「至尊瑰寶」！羅富全出三隻，此馬乃「不明物體」也。