(曾智華)
打工仔通常最怕的，不是捱，而是——唔知老細想點！
小弟做過上司，也做過下屬，當然，更有無數各級打工仔老友，上至打工皇帝，下至公務員第一薪級點，一致認為對住個工作目標不清晰的老細勁大鑊，因佢分分秒秒搖擺不定，連自己想點都唔知，做乜都會衰收尾。
有感而發，正因見到世界最高權力的特朗普，上任後搞到世界大亂，包括胡亂加關稅、胡亂霸佔別人領域、胡亂出兵⋯⋯用的是非常自私的理由，一切以我為先，我要著數晒！
難得佢有班死忠粉，唔理佢做乜，都話——正呀、啱呀、叻⋯…佢至叻，救世主呀。
搞搞吓，狂特都以為自己是神，乜都做得出，包括未經國會同意及聯合國通過，就走去綁架別國總統。
基於美國強大，一如黑社會大佬，若冇法律可以制衡佢，必定逢人都恰，越玩越狼。
自從綁架委內瑞拉總統「成功」後，即開始踏上一條「成功乃失敗之母」的不歸路。
一旦沖昏腦袋，立即聯同以色列攻打伊朗，同樣冇國民支持（民調清楚顯示），冇國會認可及聯合國通過，純靠惡。
究竟哈梅內伊點解咁易畀你殺？唔知，只知狂特起初誤以為今鋪必定直搗黃龍，於是興奮爆地日日講自己目標，當然由剷除伊朗政權及銷毁佢哋軍備開始，繼而邊個接任伊朗冇佢批准，都要殺殺殺（倒轉又如何？）。
老細上晒頭，身邊冇個敢向佢冷靜地分析大勢。結果伊朗打唔死，變美以踩中蜜蜂竇，美國高層及軍事智囊見到總統亂嚟，開始低調進諫。問題在，如今發展到特朗普都再唔知自己想點，呢鑊杰撻撻「粥」，點收科？我估最後必定衰衰哋再亂噏——我贏咗喇，伊朗瓜柴喇，美國唔玩喇！