投注賽馬，單靠睇貼士，冇乜滿足感，真正馬迷必定喜歡自己刨，若能捉正隻幾十倍馬，贏Q及二三四重彩，咁就會興奮到爆晒玻璃，有衝動撲出街大聲歡呼。
當然，有衝動唔等於會做，但用手機即時向一眾馬迷老友報喜（晒），則幾乎是指定動作。若收埋呢種爆炸性興奮唔畀人知，會鬱到病㗎！
每季我都會捉正三五隻呢類馬，全部都擺明操好晒又試閘出色，但多數初出，通常完全冇馬評人品題，馬房例湯貼士可能也冇，故多會幾十倍賠率。
呢種情況，小弟當然小小哋二重彩複式，再Q及位置Q拖埋佢。
今季中正兩隻，一為黎廄的「冷娃」，初出五十倍剷入P，再出仍無人信，三十一倍W出，真係肥過肥豬仔。
另一隻為賀廄的「泰力」，初出跑千四米，四十倍，近尾返。三個星期後再出，增程千六米，之前操到火紅火綠，試閘靚絕，又係完全冇人信，加上艾兆禮換潘明輝，結果冷到四十七倍勝出，哈哈，今次又中二重彩複式，興奮到幾乎心臟病發叫十字車。
上周日小弟又𥄫中一隻，為今日標題的「豪邁先登」。當日葉廄罕有用馬海戰術，出八隻，當中潘頓的「舉步生風」贏硬，另「榮駿大道」也是冇W有Q，但兩皆熱門，邊有肉食？必定是做纜躉過關！過邊隻？研究後，發覺「豪邁先登」次次試閘皆極悅目，但竟是六十一倍。結果隻馬在直路自動波殺上，但慘被頭馬「怡昌光輝」封死。巴度見冇得爆，即收，隱藏實力無謂曝光。各位，寶藏嚟㗎！
今晚再研究葉廄，又出八隻趕畢業。當中「北地烈馬」、「精益大師」及「謙謙君子」皆有機會，可三串七W十蚊，再三串四P二十蚊，等食龍蝦消夜。