曾智華 精彩人生自己創
近兩周真真好片如麻，睇都睇唔切。尤其院期畀《夜王》霸得七七八八，其他片不少逼到天地場，好難就時間。
難就，唯有作出取捨。決定先睇《犯罪101》，因有兩位自己非常喜歡的演員——基斯咸士禾夫及麥克雷法路。
基斯勝在一臉正氣，連扮大賊都描述到佢只揸槍而不開槍，最後亦金盆洗手。
麥克則是老戲骨，除奧斯卡外，得獎無數，演技早獲肯定，真係演乜似乜。今次谷肥少少，扮演一個精力略欠但鍥而不捨的老差骨，入型入格，劇情一邊發展，佢表現及變化不斷增強吸引力，令觀眾追看，肉緊睇佢點破案。
最奇特為佢破案之後天外有天，布局出人意表，令影迷樂透，我當然不劇透。
此片改編自美國作家Dan Winslow的同名小說，導演巴特禮頓自編自導，此君早承認自己是執導《盜火線》的電影大師米高曼崇拜者，故此，在《犯罪101》中，嚴格講，有不少《盜火線》的味道，尤其拍攝大城市晚上的現代又冷漠氣氛。
《犯罪101》看點好多，導技、演技之外，其他製作配合也相當出色，尤其攝影、剪接及配樂，理應在下屆奧斯卡中得到提名。
另值一提為「第七十四屆奧斯卡最佳女主角」荷爾芭莉，竟肯接此片。雖名為女主角，但戲分不多，角色也不太討好，扮演一位開始被公司冷落的保險公司高層，要靠身材及口才去討好大客，但因已經59歲，上司當然靜靜捧另一位可冧客的年輕女中層取代佢。內心掙扎，加上欠經濟安全，遂決定與大賊聯手。
荷爾有幾場需以唔夠瞓兼素顏殘樣出現，相比二十四年前演鐵金剛女郎的Top Fit狀態，有點歲月催人，不過，這才是真實人生！