香港乃資本主義社會，自然一切向錢看外，也強調社會地位與財富。
有乜可以向公眾「晒」呢？淺薄一點的會著到成身名牌，又或揸架歐洲跑車嘈喧巴閉招搖過市（討厭）。其他就是拼命攞各式名銜，例如慈善機構總理主席，又或各大商會會長等。當然，最正是擁有人冇你有的會籍，例如高爾夫球會、鄉村俱樂部、香港會⋯⋯
有一種身份，在香港尤其馨香，十個馬迷十個都想試吓，正是——做馬主。
調查顯示，香港千萬富翁N咁多，佢哋有冇能力做馬主呢？答案係——冇！
若果你冇半億至一億現金，都係死咗條心好喇，因買一隻馬，「平平哋」都要二、三百萬元，略好的已要千萬元。
買咗隻馬，只是美夢/噩夢的開始。
美夢是隻馬訓練幾個月後，終可報名出賽，此時你當然呼朋引類齊齊入場，在沙圈風騷，睇住愛駒必喜不自禁，搏命打卡，然後扮晒嘢問練馬師策騎指示，以及問騎師將會點跑（你識咩？）。
噩夢則是馬匹未抵港，費用已似失匙夾萬——原地醫療檢查費、保險、運費⋯⋯外，一到港，交任何一個馬房開始，就要付以下費用：練馬、養馬、聘請騎師/策騎員、針藥、補充劑、治療費、手術費、馬具、墊料、飼料⋯⋯最新平均費用為每月五萬元過外。老友，你能負擔嗎？仲有，買咗馬，畀足所有費用，仍不保證這隻馬能出賽及跑幾耐。出師未捷已「收工」的例子，比比皆是。
今日講做馬主，因開始一年一度抽養馬權喇。一生人一次，有財力的，發個夢也無妨。
明日一班賽事跑千二米，三匹高晒——「舉步生風」、「笑傲江湖」及「氣勢」，會否又Do-Re-Mi咁過終點呢？