新年過後，人潮回流，自然就是我這位逆流大叔出動的日子，今次劍指台北。
台北，甚少陽光，也不怎麼現代化，公眾地方甚少聽到笑聲，大部分人都是斯斯文文溫溫柔柔（大部分女，少部分男），街上鮮見人情緒失控具攻擊性，不過，同時也覺冇乜活力。
這樣子的一個城市，前景相當迷糊，也不知可維持在這個狀態多久，本應無大吸引力的，但香港人就是喜歡去，去完一次又一次，點解？講到出口就無謂，總之我也如是，得閒就去。
閒日去，機場悠閒寧靜，但一上飛機才發覺，咦，乜呢啲日子班機都幾乎爆滿，搞乜？
證明任何時候，香港到台北營商或旅遊的，人流仍非常強勁。
落機放下行李，第一時間醫肚，想到的，就是來一碗紅燒牛肉麵。牛肉麵乃台灣招牌食品，萬千食肆及街邊檔供應，點分高低？簡單，師傅教落，凡見人氣鼎盛的就走入去，因食客洶湧，已是最佳市場調查，唔使問阿貴，幫襯啦！
酒店後面有條天津街，76號店內坐滿年輕靚仔靚女打工族，多20歲到30多歲。此店名「肚康食研所」（只有台灣及日本人才想得出這種名字），門口大大橫額——2025年國際牛肉麵大賞，紅燒組金牌。
咁就唔客氣喇，飛撲入去，剛有客起身，我立即坐低，決定來碗238元新台幣的紅燒清燉牛筋牛肉麵，加碟油菜，然後施施然從袋中拿出自攜廣東辣椒醬，呢味嘢，我凡開餐冇佢不歡，但香港以外絕少食肆會提供，唯有自備。
𠽌𠽌聲幾分鐘吞光，極大滿足感！得唔得？唔得點攞大獎呀？但九清一濁，正是湯頭唔夠熱，不燙口，幸而整體高水準，後會必定有期。
地址：台北市中山區天津街76號