曾智華
很久未見過一個現象——商場冇乜人，但戲院人頭湧湧。
小弟乃死忠電影粉絲，每周睇兩至四部電影，次次到大型商場內的影院欣賞。大家心照，2025年有乜電影大收？答案係——冇！即上座率甚差，差到甚少消費者會趁行商場時，順便睇套戲。
上周開始呢，情況相反，這正是《夜王》帶來的哄動。
事實，此片雖未可攞足一百分，但可觀之處甚多，單講欣賞演技一瓣，已值火速入場。
兩位主角黃子華及鄭秀文固然交足貨，尤其黃子華，一向被批評為「永遠在演黃子華」，包括在大收特收的《破．地獄》也如是，故沒有機會被提名金像獎最佳男主角，絕對合理，人紅，大受歡迎，並不代表演技已爐火純青。
但我睇，呢套佢有機會嘞，大家可入場印證一下。子華今次扮演夜場「爸爸生」總經理，簡直上身。
戲內另有兩位演員，也令人眼前一亮，去到「嘩」的一聲。第一位是盧鎮業，大家可記得《年少日記》中的鄭Sir？斯斯文文，略帶憂鬱，對社會充滿理想，但卻要面對無奈的現實。因表現出色，前年被提名金像獎最佳男主角，演技得到行家的認許。
鄭Sir的形象，令觀眾深入腦海，但今次在《夜王》中，又再見真章，原來佢可以一百八十度反轉，扮演奸到出汗的陰險富二代，同樣地上晒身，冇得唔服。
另一位女演員出場不多，但一出就搶盡，頗有當年詹瑞文及王菀之初登大銀幕時帶來的意外驚喜，名字叫蔡蕙琪，乃中英劇團出身的演員，肯定其演出不少是自己先度好，再向導演提議的，有兩場真真笑到碌地，無謂劇透，大家入場，自會揭曉。
《夜王》票房應過億元，我有信心！