曾智華
每朝七點，我例必進入茶記歎早餐及看報紙，間中也「歎」埋隔籬枱的士大叔/伯在鬧呢個嗰個，然後「哭喪」。哭乜喪？當然是哭股喪及馬喪。
佢哋真係慘㗎，日日踩到腳軟，辛辛苦苦賺埋啲錢，以為炒股或買馬可以致富，結果，當然食白果，食完醒醒又再食。
昨日肥伯又呻到樹葉落：「頂佢頭槌，隻美團2021年2月升到460蚊，一年後插低到230蚊，冇咗一半，我諗呢鋪撳地游水再博反彈喇。火速掃咗幾手，結果？MM聲，揸咗幾年，如今得返80蚊，血流成河，仲要畀老虎乸日哦夜哦，話我冇眼光，真係人都癲呀！」
呻完，到矮伯接力：「唉，初三老友教我，話買馬仔，燈神好準，凡見開閘前啡燈馬，就做膽買Q及二重彩複式全餐，好易有得執，因啡燈錢乃聰明錢，幕後人重注，八九成機會中，因班友在黑，馬迷在光。」
結果點？第二樣唔知，但講賽馬，我當然瞭如指掌啦。事實，身邊不少老友也是「拜燈族」，凡見啡燈就跟，小弟也曾真金白銀實驗過，結果是——輸甩褲。
以矮伯的經驗為例，初三八隻開閘前重飛啡燈馬，結果凡跟都重傷，因只得一隻W、一隻Q，若隻隻跟買Q及二重彩複式，落注2310蚊，派彩996蚊，淨輸1314蚊（一生一世呀）。
N年前馬會高人老友笑笑口講：「碌Sir，賭馬完全冇必勝法，咪自己呃自己嘞。若有，練馬師及騎師就唔使日日三點爬起床操馬啦，行雷閃電凍到黐肺都死頂㗎！」
今晚黃智弘應該騎「仁心星」畢業嘞，此駒上周日在沙田「胡混」一次，擺明今晚才現真身，放心買佢搭「太陽勇士」及「大浪圖田」啦！