曾智華 精彩人生自己創
新春歡聚，各路英雄有各種話題。昨晚我參加一個聚會，認真過足癮，在座全部70開外，退晒休，之前乃各行各業打工精英（用「皇帝」兩字未免誇張），總之，全部去到經常要「面聖」（即被大老闆召見之位）。
老闆，尤其華人大老闆，十之八九對外時和藹可親，謙謙君子，以禮待人，但返到公司，對住下屬，心態一百八十度轉變，「喂！我出糧畀你㗎！」立即露出真面目。
呢呢，是晚我哋話題，正是老細省下屬十八法，開波之後，嘩嘩，各人踴躍發言，笑到碌地。當然，N年前身受者，可能比「處死更難受」。包括：
一、愛你變成鬧你。老細睇中你，準備大力提拔，但又唔想你畀其他老臣子眼紅或平排者妒忌鈎腳，於是開會時鋪鋪省你，明畀Z你食，其實替你排除障礙，真正升的是你。
二、借媒體公開省。香港上市公司大老細，乃財經報、電視台及網台追訪對象、寵兒，故此，只要佢想曝光，透過公關一放聲氣，自然大把記者求訪。呢呢，此時老細就可借機講吓公司業績及願景，同時間接省個別下屬，句句有骨，普通觀眾未必明，但公司同事及江湖同業，一聽就知被針對者，死期近矣。
三、筆訓。一般老細罵人，多喜歡兜面，但大老闆未必個個擅詞令，上輩的，多為外江人，廣東話不靈光，但支筆則可以好犀利。於是不用口訓斥下屬，而用筆寫，此之為「筆訓」也。有的公開，有的單對單，最辣係見埋報㗎，問你死未？
小弟又如何？N年前見過的，有會議室內拍枱大罵，掟File，成班高層排排企受罵，甚至開會途中趕你出會議室，乜都有。
但全部俱往矣，一切今天已變笑談。