五十年前，TVB有個橫掃全港收視節目，名《雙星報喜》，當中大受歡迎環節，為許冠文、許冠傑兩兄弟扮鬼扮馬，手執膠槌扑扑扑，一邊扑，一邊互問互答：「點到你唔服？點解我要服？」然後文哥講出一些似是而非的道理，搞到傑仔啞口，然後被扑。
想起呢一幕，因上周日沙田馬場跑十一場，榜首兩大騎師「軟硬鞭」及「哈囉文」竟一反常態，由壟斷大部分頭馬，變突然夢遊馬場，一W都冇。「哈囉文」更心狠手辣，零P。兩兄弟齊齊出軟鞭，讓位畀各兄弟搵食，尤其艾兆禮，「騎師王」開飛七倍，肥過肥豬仔。
其實大哥、二哥幾時去、幾時縮，都有跡可尋，尤其當日有級制賽，若佢哋兩位肯定冇機會勝出，就會部署連場遊馬河，記住呢個Pattern啦。仲有仲有，留意頭場，若潘頓勝出而精神爽利、笑口噬噬，咁當日就多會連珠爆發。相反，若騎馬行沙圈時打呵欠，咁就會不停冇影，上周日又示範表演喇。
今晚跑馬地賽事，報名時，顯示本來大衛希斯會大舉出擊的，正選八隻，唔會玩玩吓。
可惜天不從人願，有邊線機會的「古惑大師」排十二檔，瓜得！另一隨時可以起筷的「東方魅影」，又係十二檔，吹乒乓。
幸而仍有兩隻有得分又可以W、P的。第一為「魅力知耀」，1650米排七檔。此馬屬楊明綸嫡系坐騎，今季出七次全佢經手，幕後信晒佢。兩季出賽十次，未W過，九次在沙田跑。終於，今季兩次千六入位，決定轉戰快活谷1650米，有取易不取難味道。
希斯另一餐士馬為「天外迎天」，兩W皆由潘頓殺，此馬特色為無懼外檔，上次十二檔贏，今次十檔，換來賠率，必須投佢一票。
