各國領導人排隊來北京訪問，中西媒體關注哪位得到中國最高規格款待。英國首相施紀賢就好好彩，等於中了頭獎。事關習主席的閒話一句，掂啦！
想當年，習近平國事訪問英國，英女皇事後用非常英式的巧妙方法，盡吐心中情，BBC中文網事後的報道，睇到我目瞪口呆。話說女皇在白金漢宮花園下午茶會，遇到2015年10月中國領導人訪英期間指揮的警方負責人。女皇說：「哦，運氣不佳。」旁邊的傳媒聽到女皇接著抱怨，話中方官員畀氣佢受喎。
過門都係客，女皇如此一說，釀成中英外交風波，雖然事過境遷，大半年了，女皇陛下攞返出嚟講，中國駐倫敦大使館發言人也毫不含糊說︰「習近平主席去年對英國的國事訪問非常成功。雙方在工作層面為訪問成功作出了巨大努力。」BBC評論，中方隻字不提英女皇，即係話，你唔道歉都算數，順口講句多謝女皇，如是者，事情可圓。偏偏對方忽略這一點，之後，中英關係唔好得去邊，英方主動對中國科技諸多限制，也不太鼓勵兩國科學技術交流。
好快迎來馬年，唔開心嘅嘢，當唔記得。習近平歡迎施紀賢，特別提到「中國農曆馬年春節即將到來。相信你這次訪問一定能取得成功，兩國合作也一定能一馬當先，為中英關係和兩國合作開新局」。
不單如此，還公開讚賞施紀賢的「同中國接觸是必選項」之說。換言之，英相有面英國有面，祝願馬到功成！
